IX, PSOE y C’s proponen una llei electoral que caltién 3 circunscripciones con un sistema de restos

IX, PSOE y C’s proponen una llei electoral que caltién 3 circunscripciones con un sistema de restos
26 xineru 20:14 2016 Imprimir

Gaspar Llamazares, voceru parlamentariu d’IX na Xunta Xeneral, Fernando Lastra, voceru del PSOE, y Nicanor García, de Ciudadanos presentaron esta mañana la Proposición de Llei de Reforma de la llei electoral asturiana, que caltién les trés circunscripciones y desbloquia les llistes.

Los tres partíos que presenten la Proposición considérenla dafechu un proyectu de llei pioneru, vanguardista y valiente en relación a la rexeneración de la vida política n’Asturies. Poro, La nueva llei preve calterner les trés circunscripciones artificiales que s’inventara UCD pa beneficiase de partir el votu lo que da una idega de que nun s’entiende la unidá territorial y política d’Asturies y caltiense al país como la única comunidá que nun tien un repartu electoral acordies cola normalidá xeográfica y alministrativa del país.

Llamazares considera qu’esiste una mayoría abonda, cuidando que son cuatro les formaciones representaes na Xunta Xeneral que tienen diferencies menores pa llograr qu’un asturianu/a sía un votu y que les coincidencies en relación al procesu electoral son bien mayoritaries: “Ye una reforma pionera, que merez la pena que los grupos que lu han incluyeron nel so programa electoral incorpórense a la ponencia y qu’a lo llargo del añu 2016 pueda haber una reforma electoral del sieglu XXI, porque avera’l parlamentu asturianu a los ciudadanos”, resumió Llamazares en referencia tamién al grupu de Podemos, que nun robló la iniciativa.

Esta reforma de la llei electoral caltien les trés circunscripciones esistentes n’Asturies, pa les que s’escueyen 35 diputaos atendiendo al númberu de población en caúna d’elles, pero establez una especie de bolsa de restu con otros 10 diputaos, en función de los mayores cocientes. Ente les novedaes tamién figura la implantación de les llistes desbloquiaes, esto ye, el votante va poder optar por establecer un votu preferencial dende’l candidatu númberu 2 al númberu 10, porque la cabeza de llista a la presidencia d’Asturies tendrá de ser escoyíu dientro de cada partíu por elecciones primaries o, como consta na redacción de la llei, “por aciu un procesu democráticu que garantice la concurrencia de candidatos y la participación directa de, siquier, los sos militantes”.

La redacción d’esti proyectu de llei que va empecipiar la so tramitación na cámara asturiana inclúi una serie d’incompatibilidaes, tendentes a qu’una persona ocupe un solu cargu. Nun va ser compatible ser conceyal o alcalde con ser diputáu, nin tampoco los candidatos a ser diputaos n’Asturies van poder ser parlamentarios nel Congresu o nel Parlamentu européu. Tampoco van ser elexibles viceconseyeros, directores xenerales, xefes de gabinete de les conseyeríes, presidentes y directores de caxes d’aforros de fundación pública, miembros del conseyu d’alministración de la RTPA y responsables de sociedaes con mayoría de capital públicu.

La futura llei recueye tamién de forma novedosa la sustitución temporal de los diputaos en casu de baxa per enfermedá hasta 30 díes, permisu per maternidá o paternidá y otres circunstancies acreditaes. El plazu de sustitución nun va pasar de seis meses prorrogables a otros seis.

La redacción inclúi tamién la obligación de que los medios de titularidá pública programen, siquier, dos alderiques electorales ente quien encabecen les llistes a Presidente ente les fuerces polítiques yá representaes na Xunta Xeneral o llograren representación en dalgún de los procesos electorales desenvueltos n’Asturies na anterior llexislatura.

  Categories:
Loading Facebook Comments ...