Portada Comunicación IX presenta una iniciativa pa reformar el reglamentu y usar l’asturianu nel parlamentu

IX presenta una iniciativa pa reformar el reglamentu y usar l’asturianu nel parlamentu

by redacción asturnews

Izquierda Xunida vieno acabante rexistrar esti miércoles una propuesta pal cambéu del Reglamentu de la Xunta Xeneral del Principáu cola fin de garantizar la posibilidá del usu del asturianu por cualesquier persona nel Parlamentu Autonómicu y evitar que, como asocedió ayeri, nengún grupu pueda torgar que comparecientes ensin acta de diputáu puedan utilizar la llingua vernácula.

La vocera d’IX, Ángela Vallina, aseguró na presentación de la iniciativa “que con esta iniciativa pretende dase cumplimientu al espíritu de la Llei d’Usu y Promoción del Bable Asturianu, aprobáu hai yá casi trés décades pol Parlamentu asturianu y que fuera respetáu por tolos grupos hasta ayeri, cuando coaligadamente PP, Vox y Ciudadanos, negaron a la Conseyera de Cultura -de la que depende la Llingua- dirixise a la Cámara n’asturianu inclusive cuando respondía a parllamentarios qu’utilizaron esi idioma nes sos veces d’entrugues”.

“Mientres 28 años nun hubo problemes pero les dereches de PP, Vox y Ciudadanos punxéronse d’alcuerdu pa xenerar un conflictu llingüísticu que nun esiste na cai . Aprovecharon una briguera nel reglamentu de la Cámara pa torgar que la Conseyera Berta Piñán usara l’asturianu na esposición del so programa d’acción ya, inclusive, pa responder a quien se dirixíen a ella usando l’asturianu”, recordó Vallina.

Pa la vocera d’IX ye imprescindible torgar conflictos como’l vivíu esta selmana y que nun respuenden a otra cosa más qu’al enfotu de dellos grupos por “enterriar” la política asturiana: “Nun nos sospriende VOX, que lleva nel so ADN el antiasturianismu y ye de los que pedriquen qu’hai qu’acabar colos parlamentos autonómicos. Lo que sí ye incomprensible ye la falta de coherencia de grupos como’l PP o Ciudadanos, que defenden n’otres comunidaes l’usu de les sos llingües, como en Galicia, Valencia, Euskadi o Cataluña y, sicasí, equí, quieren acabar col asturianu saltándose inclusive les lleis que fueron aprobaes pol mesmu Parlamentu, porque eso ye lo qu’asocedió ayeri: una coalición de la derecha más rancia pa tratar d’humildar a quien quier falar l’asturianu torgalo ellí onde precisamente s’aprobó la Llei d’Usu y Promoción del Bable-Asturianu”.

Pa evitar esti tipu d’usu torticeru del reglamentu, Ángela Vallina, en representación d’IX solicitó’l cambéu del artículu 11 del Reglamentu de la Xunta Xeneral del Principáu d’Asturies, de tala forma que recueya de forma espresa que, “nel marcu de lo dispuesto pol Estatutu d’Autonomía y, nel so casu, pola lexislación que lo desenvuelva, tanto los Diputaos nel exerciciu de les sos funciones parlamentaries como cualesquier otra persona que compareza ante la Cámara van poder utilizar el bable o asturianu”.

Ángela Vallina anunció qu’IX va trabayar a lo llargo de la llexislatura pa tratar de llograr que, d’una vegada por toes, modifíquese l’Estatutu: “L’asturianu tien de llograr la oficialidá y creemos que ye posible un consensu pa sacalo alantre. N’IX lleva defendiéndose dende va décades y creo que nestos momentos el consensu ye mayor, gracies a otres fuerces que por fin se sumaron a la oficialidá na reforma estatutaria y otres que toi convencida que lo fadrán más si siguen produciéndose episodios como’l d’ayeri”.

Tamién te podria gustar