IX pide esplicaciones sobre los daños a pieces del castru del Chaosamartín

IX pide esplicaciones sobre los daños a pieces del castru del Chaosamartín
04 marzu 15:00 2019 Imprimir

IX vieno acabante solicitar la comparecencia de la Directora de Patrimoniu énte los posibles daños a un importante volume de pieces del Castru del Chaosamartín y pa pedir esplicaciones sobro los restos afectaos pol mugor nel centru d’interpretación.

El grupu parlamentariu d’IX na Xunta Xeneral solicitó la comparecencia na Comisión d’Educación y Cultura de la Xunta Xeneral de la Directora Xeneral de Patrimoniu Cultural, Otilia Requejo, énte’l barruntu de qu’un indetermináu, pero importante, volume de les pieces del Castru del Chao San Martín fueron severamente afectaes pol mugor incontroláu del centru d’interpretación del castru, y nel que la Dirección Xeneral de Patrimoniu Cultural “reconoció la so absoluta ignorancia hasta la denuncia formulada pola oposición municipal” sigún ka vocera d’IX na Xunta Xeneral, Concha Masa, qu’alvirtió güei tres la celebración de la Xunta de Voceros, de que nun se-yos ta faciendo casu a los espertos y cuérrese el riesgu de qu’Asturies pierda o se deteriore un patrimoniu cultural bien importante.

El Grupu Parlamentariu d’Izquierda Xunida solicitó la comparecencia pa mañana na Comisión d’Educación coles mires de qu’esplique con urxencia les midíes de control y siguimientu de les condiciones alcordaes nel conveniu de collaboración ente’l Conceyu y la Conseyería d’Educación y Cultura cola supervisión del Muséu Arqueolóxicu d’Asturies, depositariu oficial de la colección arqueolóxica, y les posibles consecuencies que lo asocedío pudiera tener sobro los bienes arqueolóxicos ellí curiaos, dalgunos d’ellos “escepcionales”.

El castru de Chao Samartín, Bien d’Interés Cultural con categoría de Zona Arqueolóxica, ye unu de los bienes más destacaos del patrimoniu cultural d’Asturies. El conxuntu integráu pol yacimientu y les instalaciones museístiques asociaes alluguen amás decenes de miles de pieces recuperaes nes escavaciones arqueolóxiques realizaes nos castros meyor estudiaos del occidente d’Asturies ente los que se cunten, ente otros, los de Coaña, Pendia (Boal), Cabo Blanco (El Franco) o Taramundi.

  Categories:
Loading Facebook Comments ...