Portada Política IX llogra una Comisión na Xunta Xeneral pa consensuar la normalización llingüística

IX llogra una Comisión na Xunta Xeneral pa consensuar la normalización llingüística

by redacción asturnews
Llamazares y dellos otros diputaos d'IX na Xunta Xeneral

Izquierda Xunida propunxo esti llunes la creación d’una comisión non permanente y non lexislativa pa la promoción, protección, y normalización de la llingua asturiana na Xunta Xeneral del Principáu.La propuesta d’IX cuntó col sofitu de los grupos parlamentarios del PSOE, de Podemos y Foro Asturies, y el votu en contra del PP y Ciudadanos. Darréu de la votación favoratible a la propuesta d’IX, la Xunta va cuntar con esta comisión sobre la promoción, protección y normalización de la llingua, que nun plazu de seis meses dende la so constitución tendríua d’ufiertar distintes alternatives sobre’l réxime de protección y promoción del asturianu. La coalición espera tamién qu’esta comisión sirva pa llograr un ampliu consensu sobre la nomalización, impulsu y aceptación social y puea camudar el votu de los dos partíos, PP y Ciudadanos, que se manifestaren contrarios.

IX camienta qu’esta ye una comisión complementaria a la d’Educación cuidando que, por muncho que la cooficialidá nun vaya tar nel programa de la llexislatura siquier de primeres, como ye’l deséu d’IX, “sí se pue dir trabayando en toles facetes y maneres posibles sobre la promoción y protección de la llingua asturiana”, como declaró Concha Masa, vocera alxunta d’IX na Xunta Xeneral. L’oxetivu d’IX ye qu’esta comisión pueda rematar los sos trabayos y conclusiones, ye dicir ufiertar distintes alternatives sobre’l réxime de protección y promoción del asturianu, nun plazu de seis meses dende la so constitución.

El testu de la iniciativa reconoz que’l réxime de protección del asturianu ye discriminatoriu ya inxustu y amás “totalmente insuficiente ya ineficaz pa caltener les sos posibilidaes comunicatives y de pervivencia social”. Entiende’l grupu d’IX que dempués de más de 30 años d’autonomía, “llegó’l momentu de que Asturies tenga un futuru cultural como sociedá articulada, non escluyente y con futuru, asumiendo programáticamente la necesidá d’un gran consensu políticu y social sobre les midíes necesaries pa la normalización sociolinguistica de la llingua, el so nivel de protección, el so impulsu y la so definitiva aceptación social. Esi consensu debe modularse dende la más amplia participación social y ciudadana y esi ye l’oxetivu d’esta comisión non lexislativa”.

Tamién te podria gustar