IX espera que cambie la opinión d’Areces sobre la oficialidá de la llingua asturiana

21 xunu 23:21 2006 Imprimir

Depues de qu’Areces refugare nuna entrevista televisiva que’l nuevu Estautu asturianu-y diere calter d’oficial a la llingua asturiana, representantes d’Izquierda Xunida recordaron cómo la so fuerza política yá fizo cambiar d’opinión al presidente del Executivu n’otros temes, poro ‘aspiren a convencer a los socialistes pa qu’acepten la oficialidá del asturianu’. Sicasí, dende IX recordáron-y al presidente asturianu que la llingua asturiana ‘ta condenada a desaparecer si nun se-y da esti reconocimientu llegal’.

Nuna entrevista concedida al Canal 10, el presidente del Principáu d’Asturies aseguró que l’actual regulación del asturianu, nel artículu 4 del Estatutu d’Autonomía, ‘va mantenese ensin variaciones sustantives’. Dende los sos socios de gobiernu, Izquierda Xunida, esperen poder cambiar esta actitú de la FSA, como yá ficieren con otros temes, y recordaron qu’estes negociaciones, amás, ‘llevaríense a cabu n’ámbitu parllamentariu y non nel Gobiernu’.

IX, que piensa defender los sos plantegamientos ente la reforma estatutaria, ve per otra parte ‘preocupante el fechu de que los socialistes empiecen el debate sobre la base de lo que nun va tener l’Estatutu’. Noemí Martín, portavoz d’IX na Xunta Xeneral, ve un erru ‘empezar la reforma dende’l ‘non’, porque da a entender prexuicios nesa materia’.

García Valledor, conseyeru de Xusticia y dirixente d’IX, aseguró que nun alcuentra chocante esta postura d’Areces, ‘que yá ye conocida por toos’ y desplicó que les sos aspiraciones pasen per una Asturies ‘ensin complexos, onde se respeten y se valoren los elementos que nos identifiquen como pueblu’.

  Categories:
Loading Facebook Comments ...