IX encamienta al Principáu a que dexe sonar la música en vivu

IX encamienta al Principáu a que dexe sonar la música en vivu
28 xunu 09:53 2017 Imprimir

IX pide nel Parlamentu y nos conceyos un cambéu na normativa autonómica pa dexar sonar la música en directu nos locales d’hostelería, garantizando sía que non la seguridá de los espectadores y el derechu al descansu de les vecines y vecinos.

La iniciativa, que respuende a un problema que lleva tiempu na cai, pretende conxugar los intereses de los músicos qu’agora nun pueden tocar en directu (dándose la paradoxa de que la mesma música enlatada sí podría sonar), colos intereses de los hosteleros y los vecinos. “La distinción nun tien sentíu”, aseguró la diputada d’IX, Concha Masa, que xunto con Gabriela Álvarez, responsable de Política Municipal de la coalición y el conceyal d’IX d’Uviéu, Roberto Sánchez Ramos, presentaron nel Parlamentu autonómicu la Proposición Non de Llei, que va ser moción nos conceyos onde IX tien representación. Masa sostuvo que n’Asturies la música en vivu ye xuna manifestación cultural y que nun tien sentíu pone-y torgues. “La música en vivu tien que tener, siquier el mesmu valor que la tresmitida electrónicamente”, esplicó. Concha Masa considera que la distinción ente música enlatada y en directu nun tien sentíu, siempres que se respete’l derechu al descansu de los vecinos y la seguridá de los espectadores

A xuiciu de Gabriela Álvarez ye pernecesario modificar la normativa vixente y afaela a la realidá por que, como reivindica la plataforma constituyida, nun se produza “nin un acorde de menos nin un decibeliu de más”. “Nun tien sentíu que’l Gobiernu siga cerrando los güeyos énte una realidá” como ye la música en directu, siempres que se cumpla coles normatives pa nun fadiar a los vecinos, esplicó la responsable de Política Municipal d’IX d’Asturies. La moción foi treslladada a tolos grupos municipales.

Roberto Sánchez Ramos, Rivi, sostuvo la necesidá de modificar una normativa “bien burocrática” y afaela a la realidá social. “Si la música enlatada llega a unos decibelios la que se produz en directu tien de llegar a los mesmos”, esplicó. Rivi aseguró que nun conceyu como Uviéu un conxuntu formáu por un chelo, dos violinos y un cantante de clásica nunca podría actuar nun chigre anque nun llegaren nunca a los decibelios dexaos.

  Categories:
Loading Facebook Comments ...