IX destaca coincidencies coles propuestes de Barbón

by redacción asturnews | julio 11, 2019 4:45 pm

IX destaca coincidencies coles propuestes del socialista Adrián Barbón pa la investidura pero anuncia que va buscar mayores compromisos pa dar respuesta a los problemes concretos d’Asturies, depués del discursu d’investidura del candidatu a la presidencia.

Ángela Vallina llamó güei pela tarde  a la responsabilidá de la izquierda pa llograr un Gobiernu estable de progresu y destaca l’usu del asturianu para falar de la oficialidá. Izquierda Xunida va buscar víes p’algamar mayores compromisos cola Federación Socialista Asturiana (FSA-PSOE) que dexe dar respuestes concretes a problemes concretos de la sociedá asturiana. La vocera d’Asturies pola Izquierda, Ángela Vallina destacó güei importantes coincidencies col discursu d’investidura del candidatu socialista, Adrián Barbón, magar enfatizó na necesidá de que se llogren consensos más amplios. Sía que non, la parllamentaria llamó a la responsabilidá” de la izquierda que, al so xuiciu tien que trabayar por esi Gobiernu de progresu.

“Asturies lo qu’amosó tres les elecciones ye que quería un Gobiernu progresista, un Gobiernu d’izquierdes. La izquierda suma pa ello, pero ye un Gobiernu que tien que dar tamién estabilidá”, afirmó Vallina.

La vocera d’IX reconoció’l so prestu pol chisgu d’Adrián Barbón a la oficialidá como un claru síntoma de que daqué ta camudando al respective de la llingua, dempués de que’l candidatu utilizara la llingua p’anunciar que va buscar sofitos pa la reforma del Estatutu nesti sentíu. Ángela Vallina apostó por “recuperar el diálogu” buscando consensos y da estremar intereses “de partíu” o de “egos” yá que, recordó, los políticos son la segunda esmolición de la ciudadanía.

Source URL: http://asturnews.com/ix-destaca-coincidencies-coles-propuestes-de-barbon/