IX de Mieres pide-y al alcalde qu’igüe la crisis y acusa a Dosantos d’anteponer intereses determinaos del PSOE a los del conceyu

03 xunetu 23:18 2005 Imprimir

El coordinador d’Izquierda Xunida d’Asturies, Jesús Iglesias, en declaraciones a diversos medios, amosó el respaldu de la coalición a l’agrupación de Mieres nos motivos de les sos discrepancies col PSOE por mor de la ubicación del futuru hospital pa la zona y afirmó que nun descarta el que la ruptura del pautu municipal nesi conceyu forme parte d’una estratexa deliberada pa romper el pautu a nivel d’Asturies. IX de Mieres, pel so llau, pidió al alcalde Luis María García encabezar la solución de la crisis abierta y acusó al PSOE de “absoluta irresponsabilidá”.

La presidencia colexada d’Izquierda Xunida nel conceyu del Caudal acusó directamente a Balbino Dosantos, responsable local del PSOE, d’entamar la crisis municipal obedeciendo “únicamente a les directrices marcaes por camarielles y cenáculos de poder del PSOE conocíos perfectamente polos ciudadanos y ciudadanes de les Cuenques” y tamién de “incapacidá pa anteponer los intereses xenerales de Mieres a los de determinaos sectores del so partíu”.

L’agrupación d’IX nel conceyu del Camín fizo públicu un comunicáu nel que-y pide al alcalde Luis María García -anguaño de vacaciones, fuera de Mieres- que vuelva pa encarrilar la crisis y afirmen que’l rexidor “ta obligáu moral y políticamente, pol cargu públicu qu’ocupa, a salvaguardar los intereses de los y les vecines del conceyu énte cualaquier otros”.

Izquierda Xunida diz nel so comunicáu que nun conceyu de les cuenques, una zona na que “el paru xuvenil roza el 40%, diez puntos per enriba la media rexonal ye una absoluta irresponsabilidá dinamitar un gobiernu de la izquierda plural, capaz de garantizar la imprescindible estabilidá política”. Pel so llau, Jesús Iglesias, coordinador xeneral de la coalición n’Asturies, relacionó la crisis de Mieres con intentos y “estratexes deliberaes” colos que dellos sectores del PSOE podíen tar tentando desaloxar del gobiernu autonómicu a Izquierda Xunida-BA, forzando a una ruputura del pautu póliticu nel que se sofita l’executivu tripartitu.

Nes últimes feches produciéronse reiteraos desalcuentros ente los socios de gobiernu autonómicu como l’episodiu del recién enfrentamientu ente’l conseyeru de Xusticia y Esteriores Francisco Javier García Valledor y el viceconseyeru d’Administración Pública Luis Iturrioz. L’últimu desalcuentru foi l’aprebación fuera del orde del día de la creación de les sociedaes de radio y televisión autonómiques nel Conseyu de Gobiernu -del qu’informa Asturnews nesta mesma edición- y que provocó un gran enfadu nos conseyeros d’IX-BA.

La ruptura del pautu municipal en Mieres tensa inda más la cuerda de les relaciones ente PSOE ya Izquierda Xunida y al pesar de lo caltenío pola FSA de que lo sucedío nun tien d’afectar a la política asturiana y a les relaciones ente entrambos partíos, dende la coalición d’izquierdes nun paecen vese les coses dende la mesma perspectiva.

  Categories:
Loading Facebook Comments ...