Portada Sociedá IX-BA y PSOE prepárense pa valorar el so pautu políticu a los dos años de robláu

IX-BA y PSOE prepárense pa valorar el so pautu políticu a los dos años de robláu

by asturnet

La comisión executiva de la Federación Socialista Asturiana (FSA) aconceyóse ayer n’Uviéu pa preparar l’alcuentru del prósimu viernes 8 colos sos socios de gobiernu d’Izquierda Xunida-Bloque por Asturies. Inda malpenes trescendió cosa de la reunión, darréu d’ella, el secretariu zeneral de los socialistes asturianos, Javier Fernández empobinó hasta Mieres pa respaldar al PSOE local na so ruptura del pactu municipal con IX. Fernández refugó les acusaciones del coordinador d’Izquierda Xunida Jesús Iglesias, respective a la esistencia de movimientos pa forzar la salida de la coalición del gobiernu y aporfió en que lo sucedío en Mieres nun yera estrapolable a Asturies.

El llunes 4, Iglesias, tamién dende Mieres, onde acudió a sofitar a los ediles d’IX, barruntó la posibilidá de que sectores del PSOE tuvieran entamando una estratexa pa llevar a la coalición d’izquierdes a una situación límite col fin de forzar una ruptura del pautu políticu d’Asturies. Unos díes enantes, fuera’l dirixente d’Izquierda Xunida de Xixón, Jesús Montes Estrada, ‘Churruca’, el qu’advirtiera nel mesmu sentíu. Javier Fernández, cabezaleru de la F.S.A. calificó eses acusaciones de “cortina de fumo”, desmintiólo y lo único que desveló de la valoración fecha del pautu autonómicu pol másimu órganu de los socialistes asturianos foi que yera “razonable l’aceptación del PSOE al desarrollu del alcuerdu”.

La dirección d’Izquierda Xunida aconceya güei pa facer la so particular valoración y preparar l’alcuentru del viernes 9, nuna reunión na que sin dulda los últimos enfrentamientos y desalcuentros colos socialistes van ocupar un sitiu destacáu.

Per estes feches cúmplense los dos años del pautu de gobiernu robláu ente PSOE, Izquierda Xunida y Bloque por Asturies. Un alcuerdu que llevó a la coalición d’izquierdes a asumir responsabilidaes nel executivu, con dos conseyeríes al so cargu, y que dende’l mesmu momentu de la so firma y hasta anguañu foi abondo criticáu y refugáu per sectores sociales prósimos a IX-BA, dende los sectores asturianistes hasta sindicales. Les relaciones colos socios del PSOE tampoco foron a lo llargo d’estos dos años especialmente estables, sobremanera nos últimos tiempos.

Agora entrambes formaciones polítiques tratarán de valorar lo andao hasta agora y lo qu’inda ta pendiente de desarrollar hasta’l final de la lexislatura, un tramu final que tien l’últimu enzancu nun asuntu non contempláu nel pautu como tema de cumplimientu: la reforma estatutaria que se va entamar a discutir l’añu que vien.

Tamién te podria gustar