IX-BA-Verdes y PP critiquen la política fiscal del gobiernu d’Asturies

05 avientu 04:58 2007 Imprimir

El Conseyeru d’Economía y Asuntos Europeos, Jaime Rabanal presentó los presupuestos de la conseyería pa 2008. Rabanal destacó l’aumentu del mesmu nun 7,22%, lo que cifró nun total de 4100 millones d’euros, 3.880 por habitante. Nesti presupuestu destaquen les ayudes económiques a les families ya l’actividá empresarial y la práctica supresión de los impuestos por sucesiones y donaciones. Rabanal tamien sorayó la desaceleración. alredor del 3%, que ta sufriendo’l sector de la construcción na rexón.

La oposición pela so parte criticó al gobiernu socialista en dellos frentes. La diputada del PP, Alejandra Cuetara aseguró que les cuentes presentaes pol Gobiernu d’Asturies “nin son modernes, nin s’axusten al momentu económicu actual”. La popular tamien añadió que’l gastu nesta ocasión medra más que los ingresos y que con estos presupuestos ta comprometiendose’l futuru la rexón. Dende’l PP criticose duramente al conseyeru por “faltar a la verdá” sobre los impuestos de sucesions y donaciones.

Izquierda Xunida-Bloque por Asturies-Los Verdes, na coz de Jesús Iglesias recordó-y al conseyeru que son los impuestos directos son los que deben definir y estructurar el marcu fiscal. Iglesias tamien se manifestó a la escontra de la postura caltenida pol conseyeru qu’indicó que la toma de decisiones sobre la fiscalidá verde tien de prollongase nel tiempu. “El centimu sanitariu tien de sirvir como un bon exemplu y bona esperiencia p’avanzar nes midíes de fiscalidá verde”, dixo Iglesias, que tamien pidió más polítiques fiscales que faciliten l’accesu a la vivienda y l’alquiler.

“Nun ye gastu social apoyar a los que nun lo necesiten y tampoco ye social que’l salariu social aumente en sólo ocho euros, nin qu’a un mozu con recursos se-y ayude a mercar un ordenador, o que s’ayude a una familia que nun lo necesita cuando decide tener un fíu”. Con estes pallabres Iglesias reprobó les midíes nel terren del gastu social que contempla’l presupuestu del gobiernu.

  Categories:
Loading Facebook Comments ...