Portada Política IX-BA-Verdes va defender na ponencia del Estatutu la participación institucional de los axentes sociales y la oficialidá del asturianu

IX-BA-Verdes va defender na ponencia del Estatutu la participación institucional de los axentes sociales y la oficialidá del asturianu

by asturnet

Jesús Iglesias, Coordinador Xeneral d’IX d’Asturies, aconceyó ayeri pela mañana mañana colos secretarios xenerales de los sindicatos CCOO y UXT, Antonio Pino y Justo Rodríguez Braga, pa dar cuenta de los resultaos de la ponencia estatutaria y evaluar les necesidaes d’Asturies que tovía queden por incluyir na reforma del Estatutu. Nesi sen Iglesias apuntó que’l nuevu testu del Estatutu d’Asturies tien de recoyer una Carta de Drechos Sociales, na que se mencione, la sanidá, la educación, los servicios sociales y el drechu a la vivienda, “amás de la oficialidá del asturianu”.

El Coordinador Xeneral recibió’l sofitu de los dos secretarios xenerales de CCOO y UXT pa defender esta propuesta na mesa de la reforma estatutaria y esplicó que, anque la participación de los sindicatos ta prevista nes comisiones que van celebrase, una vez la ponencia remate’l so trabayu, “ye meyor que les sos reivindicaciones se recueyan enantes de tener un testu mui avanzáu”.

El secretariu xeneral de CC.OO. tamién indicó que’l “gobiernu ta tardando demasiao en convocar a los axentes sociales pa dir buscando soluciones globales a estayes y colectivos especialmente castigaos pola crisis como son la construcción, el tresporte, el campu, la pesca, los inmigrantes…”.

Justo Rodríguez Braga esplicó la sensibilidá d’IX-BA-Verdes nes propuestes d’UXT na garantía de participación, drechos sociales y llaborales, y tamién na participación institucional de los axentes sociales y espresó’l so deséu de que’l restu de partíos dean rempuesta a la propuesta que ficieron de manera oficial. “Pa nós la reforma del Estatutu d’Autonomía tien que tener el más ampliu consensu políticu y social n’Asturies. Paeznos fundamental. En segundu llugar tien de ser reflexu de les demandes de los asturianos. Debe tamién de tener unes garantíes de desenrrollu llaboral y social”, aseguró Braga. Del mesmu mou, el secretariu xeneral d’UXT considera que la reforma del Estatutu nun se debe allargar n’escesu, más allá del branu, yá qu’Asturies vive un momentu de desaceleración y hai otros problemes qu’hai que resolviendo.

El secretariu xeneral d’UXT pidió consensu pa llevar a cabu la reforma del Estatutu pero tamién dixo “qu’anque nun se pue concebir una reforma ensin l’alcuerdu col PP, tampoco nun diba ser lóxico dexar de llau y nun cuntar col apoyu d’IX”.

N’esti alcuentru de trabayu tamién tuvo presente’l voceru nacional del Bloque por Asturies, Rafael Palacios, y el secretariu d’esta organización coalligada con IX, Pablo Fernández. Palacios, afirmó que Bloque por Asturies yá se llevó una “primera decepción” al saber qu’Asturies nun va cuntar con un nuevu estatutu, sinón que va reformase “unu vieyu”, col que los asturianos “van siguir siendo ciudadanos de segunda”. La so segunda decepción ye que que la reforma nun va ser frutu del consensu social y de toles fuercies polítiques, sinón que va ser frutu d’un alcuerdu ente PP y PSOE. El voceru nacional del Bloque solliñó que la so formación va oponese a un Estatutu que nun reconoza una carta de drechos sociales y la oficialidá del asturianu.

Antonio Pino tamién recordó’l so sofitu a la oficialidá, mientres que Justo Rodríguez Braga manifestó que defende “l’usu del asturianu, pero non con imposiciones”.

Tamién te podria gustar