IX axúntase en Samartín a les crítiques de l’Asociación de Trabayadores de la Normalización

01 ochobre 10:43 2008 Imprimir

IX-BA-Verdes nel Conceyu de Samartín xuníense tamién esti miércoles a les crítiques de l’Asociación de Trabayadores de los Servicios de Noirmalización del Principáu al manifestar la so “más firme repulsa a esta resolución del Sr. Alcalde, que vulnera flagrantemente la llegalidá vixente, qu’establez los requisitos d’igualdá, capacidá, méritu y oxetividá nel accesu al emplegu públicu; y ye, amás, especialmente grave porque llueve enriba moyao, puesto que va poco, y sobre estes mesmes custiones, el Conceyu de Samartín quedó desautorizáu mediante sentencies xudiciales a consecuencia de les denuncies que presentó’l nuestru grupu”.

La nota de prensa fecha pública esti miércoles reproduzse darréu: “Con fecha 23 de setiembre del 2008 el Sr. Alcalde de Samartín del Rei Aurelio dictó una resolución pola que s’aprobaben les bases pa la contratación d’una plaza de téunicu/a mediu/a responsable del Serviciu de Normalización Llingüística. Neses bases recuéyese, na cláusula séptima, el procesu de seleición, que consta de les siguientes pruebes: “1) De caráuter práuticu, eliminatoriu, va consistir na realización d’una o varies pruebes rellacionaes cola plaza convocada, pel tiempu que determine’l tribunal. 2) Entrevista, na que se van valorar los conocimientos, la aptitú psicolóxica, la capacidá espresiva, asina como la esperiencia de los candidatos”. Como se pue ver, el procesu de seleición nun establez cuála va ser la puntuación pa cada prueba, nin diz cómo va ser la valoración de la entrevista, nin establez cómo se va valorar la esperiencia y los méritos formativos. En definitiva, tamos énte una ausencia dafechu de baremación; polo tanto, estes bases, son tolo contrario de lo qu’han ser unes bases de seleición de personal. Ello ye qu’en cuenta d’especificar claramente y con oxetividá la forma en que se van valorar los conocimientos y los méritos, óptase por esta fórmula que dexa en manes del tribunal, nomáu pol propiu Sr. Alcalde, la interpretación llibre d’estes custiones, ensin que les persones que se vayan presentar a esti procesu de seleición puedan contrastar la puntuación que pudieren sacar colo establecío nes bases. Dende el Grupu d’IX/BA del Conceyu de SMRA nun podemos dexar de manifestar la nuestra más firme repulsa a esta resolución del Sr. Alcalde, que vulnera flagrantemente la llegalidá vixente, qu’establez los requisitos d’igualdá, capacidá, méritu y oxetividá nel accesu al emplegu públicu; y ye, amás, especialmente grave porque llueve enriba moyao, puesto que va poco, y sobre estes mesmes custiones, el Conceyu de Samartín quedó desautorizáu mediante sentencies xudiciales a consecuencia de les denuncies que presentó’l nuestru grupu. Nun entendemos de nenguna manera que’l Sr. Alcalde, dempués d’estes sentencies, nun igüe esta forma d’actuar y siga atesteronando nun comportamientu políticu que raspia’l desacatu y ta cerca de la prevaricación nesta materia. Polo tanto anunciamos yá, que’l nuestru grupu va presentar recursu de reposición escontra la resolución de l’alcaldía, y va llegar hasta onde sía menester na aplicación de les midíes llegales que se precisen adoptar pa restituyir la llegalidá en materia de contratación d’emplegu na nuestra Casa Conceyu.”

  Categories:
Loading Facebook Comments ...