Portada Educación IX anuncia una enmienda pa devolver l’estatus a l’Academia de la Llingua nos Presupuestos de 2017

IX anuncia una enmienda pa devolver l’estatus a l’Academia de la Llingua nos Presupuestos de 2017

by redacción asturnews
Llamazares y dellos otros diputaos d'IX na Xunta Xeneral

IX anuncia una enmienda pa devolver l’estatus a l’Academia de la Llingua que-y quita’l Gobiernu nos nuevos presupuestos y denuncia l’ausencia de financiamientu pal Contratu programa de la Universidá y la escasez de dineru pa infraestructures, ente otres cuestiones.

Concha Masa anunció esti vienres qu’IX va presentar una enmienda pa devolver a l’Academia de la Llingua asturiana “la entidá y l’estatus que merez”, dempués de que nel presupuestu se rebaxe so categoría como dependiente del Principáu al traviés d’un cambéu nos subconceptos nos qu’apaez el so financiamientu, otorgando-y una subvención como si fore una entidá privada. Concha Masa repitió la disponibilidá d’IX pal diálogu y pa evitar una prórroga presupuestaria que sería la peor opción nestos momentos.

Concha Masa, diputada d’IX na Xunta Xeneral, responsable de los asuntos d’Educación, Cultura y Deporte, amosó güei la esmolición pol tonu trunfalista del Conseyeru, Genaro Alonso, que paez bien satisfechu cola “exigua” xubida de los presupuestos del so departamentu colos que como dixo na comparecencia’l titular del departamentu espera superar los efectos de la crisis y “nin siquier tien en cuenta de reivindicar ante la Conseyería de Facienda” l’aumentu de dotación pa poder cubrir les munches y urxentes necesidaes de la Educación, la Cultura y el Deporte asturiano y que, evidentemente tán bien llueñe de resolvese por aciu estos presupuestos.

La diputada puntualizó que-y esmolez la situación del personal docente que vio mientres los últimos años amenorgáu’l so poder adquisitivu por cuenta de les restricciones impuestes dende’l Gobiernu d’España al axuste de les retribuciones; aumentaos los sos horarios de trabayu hasta’l máximu que dexa la normativa española, col consiguiente amenorgamientu de rendimientos; aumentada la precariedá llaboral, como reflexa l’aumentu de profesores a media xornada, y nun se contempla, sicasí, l’amenorgamientu de xornada pa los profesores mayores de 55 años, como se foi enllantando n’otres comunidaes autónomes; por nun falar del personal llaboral non docente, al que se ta apostrando nuna situación inconcebible na alministración. “Nun podemos tolerar que la mesma alministración pública vaya llevando a los sos trabayadores a una situación de precariedá y de deterioru de les condiciones llaborales”, dixo la diputada d’IX.

No referente a la Universidá, ésta tamién vio amenorgaos los sos recursos progresivamente dende años, como punxo de manifiestu claramente’l Rector, y tamos xugando tener “una Universidá mediocre”. La diputada criticó l’ausencia d’una partida dedicada al Contratu-Programa cola Universidá al que tanto l’equipu rectoral como la directora xeneral d’Universidaes tán dedicando los sos esfuerzos. “Esto resulta poco alentador”, alvirtió.

Tocantes a infraestructures educatives, IX ve un presupuestu claramente insuficiente. Les partíes pa obres de meyora y arreglu de centros son “bien amenorgaes, polo xeneral”. A parte de los arreglos, hai grandes necesidaes que riquen grandes inversiones como ye la construcción d’un nuevu IES en La Corredoria, que nun almite más demoranza, como ponen claramente de manifiestu los datos demográficos de dichu distritu uvieín. A xuiciu de la diputada d’IX esisten, amás, otres inversiones más pequenes, qu’ameyoraríen l’usu cotidianu de los centros, dalgunos inclusive axustaos colos conceyos, como nel casu de la escuela infantil de L.lena, que tampoco apaecen nel presupuestu.

La diputada d’IX esplicó que ve con prestu la palabra del Conseyeru sobre la flexibilidá nes ayudes al tresporte escolar pa cubrir toles necesidaes, cuestión qu’IX espera que s’aplique darréu”. “Dende’l mio grupu parlamentariu nun vamos consentir que s’amenorguen estes ayudes mientres quede un solu escolar en dalgún rincón d’Asturies que nun disponga de tresporte gratuitu pa movese al centru públicu nel que s’atope escolarizáu”, alvirtió.

L’amenorgamientu de los fondos destinaos a llibros y material didáctico tampoco nun “ye xustificable”, porque magar los bancos de llibros van engordando a lo llargo de los años, tamién hai que tener en cuenta otros materiales didácticos qu’arralecen notablemente, como pueden ser los materiales informáticos, esplicó Masa. A xuiciu de la diputada, los informes relativos a rendimientu educativu nun son demasiáu alentadores. Los centros nun tán modernizaos ya inclusive’l mesmu profesoráu ta precisáu de formación pa la so actualización, fundamentalmente en relación col usu de ferramientes informátiques y al usu d’idiomes.

Per otru llau, la diputada d’IX congratulose col aumentu presupuestariu na partida destinada al programa d’educación infantil de 0 a 3 años, de casi un 20%, pero echa en falta, dempués d’añu y mediu de llexislatura, una planificación clara d’esta etapa educativa que respuenda a les demandes de los trabayadores y a les distintes iniciatives aprobaes na Xunta Xeneral.

Tamién te podria gustar