Portada Educación IX aconceya col Rector y pide la firma del contratu programa a Javier Fernández

IX aconceya col Rector y pide la firma del contratu programa a Javier Fernández

by redacción asturnews

Gaspar Llamazares reclamaba esti llunes pela mañana a Javier Fernández la firma del contratu programa cola Universidá depués d’aconceyar col Rector, Santiago garcía Granda, y dexar afitao que la institución académica sía tamién incluyida na evaluación del actual Plan de Ciencia ya Investigación y nel de 2018 a 2022.

Gaspar Llamazares, voceru parlamentariu d’IX na Xunta Xeneral, reclamó güei al Executivu asturianu que cumpla los compromisos realizaos y estableza yá un contratu programa cola Universidá d’Uviéu, tal como figuraba nel alcuerdu con IX pa la so investidura. A xuiciu del voceru d’IX nel Parlamentu, ye necesario que la Universidá cunte, amás de cola inversión habitual necesaria pa caltener a la Universidá, con un financiamientu complementariu en materia d’investigación. Estes declaraciones facíales el diputáu d’IX en axuntándose col Rector de la Universidá asturiana, Santiago García Granda, el vicerrector d’Investigación, José Ramón Grueso, y Xabiel García Pañeda, delegáu de Coordinación y Estratexa Universitaria, amás de la diputada d’IX, Concha Masa.

Llamazares aseguró que la xunta de más d’una hora d’esta mañana ye “bien importante” pa IX, porque se sabe que dende principios de llexislatura la coalición comprometiera’l contratu programa. Nesti sentíu pidió-y a Fernández, non ensin ironía, que nun proponga nueves temes –en referencia a los mentaos nel discursu d’entrega de la Amuravela d’Oru nel que señaló nuevamente’l cayente demográficu, la llucha contra la corrupción o la área metropolitana-, sinón que cumpla col presente.

IX nun pide, dixo Llamazares, que sía una cuestión xenérica, sinón daqué que yá ta en marcha, que tien resultancies y de la que ye necesario ameyorar la xestión. “Tamos nel momentu d’evaluación del Plan d’Investigación del Principáu y queremos que’l Gobiernu incluya nesa evaluación a la Universidá y, amás, incluyila nel contratu programa y nel futuru Plan de Ciencia ya Investigación d’Asturies”, esplicó nel patiu del edificiu históricu de la Universidá. Xugamonos muncho, porque nun ye un momentu más, sinón el de recuperar lo que se dexó d’invertir en materia d’Universidá y rellanzar la investigación del conxuntu d’Asturies y de la Universidá en particular, porque ye prácticamente’l 80% de la investigación n’Asturies, concluyó’l voceru d’IX.

Pela so parte, el Rector de la Universidá, que realizó declaraciones a los medios tres l’alcuentru, estimó la sensibilidá d’IX escontra la Universidá”, y aseguró que la institución ta nun momentu crucial “la de ver cómo’l Principáu d’Asturies tien una esmolición y demostrar realmente que la Universidá ye daqué importante pal Principáu d’Asturies”. Sobremanera, dixo, teniendo en cuenta lo que faemos. “Nun queremos ser una unidá de gastu pal Principáu, sinón d’esfuerzu, de xeneración de proyectos y xeneración de profesionales, como fai la institución”, esplicó García Granda.

El rector, dempués d’esplicar la sintonía” con IX, porque IX foi’l grupu que plantegó’l contratu programa nel alcuerdu de investidura, sí recordó que “ye cierto que con cero euros, pel momento,”. Pa rematar aprofió la importancia de que la Universidá tenga un financiamientu por oxetivos, a parte del financiamientu ordinariu. García Granda aseguró que dientro de les negociaciones pal contratu programa 2018-2022 col Principáu, la Universidá d’Uviéu ta plantegando qu’haya una aportación inicial en 2017. “Hasta’l 15 d’avientu nun damos nada por perdío”, esplicó a entrugues de los medios sobro si anguaño cuntaría con una partida complementaria.

Tamién te podria gustar