Portada Comunicación Iniciativa va pidir la modificación urxente del Reglamentu de la Xunta Xeneral

Iniciativa va pidir la modificación urxente del Reglamentu de la Xunta Xeneral

by redacción asturnews

Iniciativa pol Asturianu denunció ayeri nuna nota de prensa la prohibición d’usu del asturianu na Xunta Xeneral y la pasividá de la cámara, al mesmu tiempu que facía l’anuncia d’una proposición de modificación urxente del reglamentu de la Xunta Xeneral.

Iniciativa pol Asturianu va proponer a los partíos una modificación urxente del reglamentu de la Xunta Xeneral
«Una vegada más vuelve a resultar triste, llamentable ya indigno que’l mesmu partíu qu’aprobó la Llei d’Usu tenga una postura tan intransixente contra la llingua asturiana».

Na nota de prensa qu’asoleyó ayeri mesmo darréu de la polémica nel paralamentu asturianu dexaba bien afitao que «la casa que representa la llibertá y la voluntá de la sociedá asturiana nun pue convertise nun llugar pa marxinar a naide pol usu de la llingua propia d’Asturies». La so narración de los fechos yera bien clara: “Esta mañana en comisión de la Xunta Xeneral, la Conseyera de Cultura, Política Llingüística y Turismu, Berta Piñán, entamó la so intervención n’asturianu. Les protestes de PP y VOX consiguieron prohibir a la Conseyera la so intervención n’asturianu, nuna acción qu’entendemos como un ataque gravísimu a los drechos de los falantes d’asturianu”.

Y por mor d’ello, dende Iniciativa pol Asturianu quixeron “recordar lo que diz el Reglamentu de la Cámara”, que nel so artículu 11, especifica: «En el marco de lo dispuesto por el Estatuto de Autonomía y, en su caso, por la legislación que lo desarrolle, los Diputados podrán utilizar el bable en el ejercicio de sus funciones parlamentarias».

Iván Llera, presidente d’Iniciativa pol Asturianu, fixo unes declaraciones el mesmu martes apuntando qu’“Iniciativa pol Asturianu llamenta un ataque indecente a la llibertá d’usu del asturianu y a la propia llingua asturiana, pero mui n’especial a los drechos de los sos falantes, que supón la prohibición del usu del idioma a la Conseyera Berta Piñán na máxima institución d’Asturies. Condergamos les postures más reaccionaries contra la llingua asturiana”.

El presidente de la organización apuntó qu’”Iniciativa pol Asturianu va proponer a los partíos una modificación del reglamentu de la Xunta Xeneral pa permitir l’usu llibre del asturianu nesta institución”. Llera amestó qu’”una vegada más vuelve a resultar triste, llamentable ya indigno que’l mesmu partíu qu’aprobó la Llei d’Usu tenga una postura tan intransixente contra la llingua asturiana. Esto nun ye yá una cuestión d’oposición a la oficialidá ye una posición d’odiu al nuesu patrimoniu cultural”.

El presidente d’Iniciativa pol Asturianu siguió diciendo que “la casa que representa la llibertá y la voluntá de la sociedá asturiana nun puede convertise nun llugar pa marxinar a naide pol usu de la llingua propia d’Asturies”.
Dende Iniciativa pol Asturianu recordamos qu’esti casu demuestra cómo la oficialidá ye l’únicu camín posible pa reconocer los drechos de los ciudadanos y ciudadanes d’Asturies a la hora d’usar l’asturianu.

Tamién te podria gustar