Portada Comunicación Iniciativa sofita la propuesta de fíu predilectu de Siero pa Nacho Fonseca

Iniciativa sofita la propuesta de fíu predilectu de Siero pa Nacho Fonseca

by redacción asturnews

Iniciativa pol Asturianu vieno acabante facer públicu’l so sofitu a la propuesta pa facer fíu predilectu de Siero a Nacho Fonseca “pol firme y acreditáu compromisu de Nacho Fonseca col asturianu” y porque “Fonseca llogró sumar la música y la docencia pa normalizar la llingua asturiana y convirtióse nun innovador na tresmisión xeneracional del asturianu”.

Darío de Dios, vocal d’enseñu d’Iniciativa pol Asturianu, anunció esti miércoles que “Iniciativa pol Asturianu sofita la propuesta de l’asociación cultural El Llavaderu pa facer fiu predilectu de Siero a Nacho Fonseca. Tola so trayectoria ye un méritu suficiente pa que mos axuntemos al restu d’asociaciones y entes que reclamen esta mención”.

El vocal d’enseñu añadió que “Fonseca llogró sumar la música y la docencia pa consiguir normalizar la llingua asturiana y la propia asignatura nes escueles y tamién convirtióse nun innovador na tresmisión xeneracional del idioma. Nun solo s’esforzó en facer del asturianu una asignatura atractiva, sinón que llogró que varies xeneraciones de neños y neñes tuvieren presente la so llingua materna a través de los cantares. Amás, dende’l puntu de vista musical la so obra ye reconocía n’otros territorios como Galicia. L’asturianu siempres tuvo presente nel llabor de Nacho Fonseca tanto na etapa docente con Xentiquina, componiendo cantares pa la so fía Esther Fonseca, faciedo’l musical ‘Nora, Mauro y los suaños’ o la collaboración de la revista ‘Cultures’ de l’Academia de la Llingua Asturiana de la que ye miembru”.

P’acabar De Dios dixo que “dende Iniciativa pol Asturianu sumámonos a esta propuesta pol firme y acreditáu compromisu de Nacho Fonseca col asturianu”.

Tamién te podria gustar