Portada Comunicación Iniciativa reclama l’usu de la toponimia oficial na llinia 36 de Xixón

Iniciativa reclama l’usu de la toponimia oficial na llinia 36 de Xixón

by redacción asturnews

Iniciativa pol Asturianu reclama l’usu de la toponimia oficial na llinia 36 de Xixón, al comprobar que la cartelería de los autobuses recueye ‘Juvería’ en cuenta del topónimu oficial Xuvería.

Iniciativa pol Asturianu reclama l’usu del topónimu oficial de Xuvería na llinia 36 de la Empresa Municipal de Tresportes Urbanos. Nesi sen, la organización recuerda que l’únicu nome oficial de la cabecera de la llinia 36 ye Xuvería, tal como recueye’l Decretu 105/2006, de 20 de setiembre, pol que se determinen los topónimos oficiales del conceyu de Xixón.

Depués de recibir varios avisos d’usuarios d’esta llinia de tresporte d’EMTUSA, Iniciativa pol Asturianu treslladó esta reclamación al Conceyu; pero entá nun s’iguó y en cuenta del nome oficial apaez ‘Juvería’. Por ello, la organización reclama l’usu de la toponimia oficial del conceyu.

Amás del usu de la toponimia, Iniciativa pol Asturianu demanda l’usu de la llingua asturiana dientro de la propia páxina web d’EMTUSA, onde na mayoría de los casos sí se cumple la toponimia, pero la presencia del idioma ye nula. La organización pide un esfuerciu a la empresa pa siguir normalizando l’asturianu al traviés del usu na páxina web.

Iniciativa pol Asturianu aprovecha tamién pa proponer l’usu del asturianu na megafonía interna de los autobuses nos que se dan anuncies de les paraes y otros avisos. La entidá recuerda qu’esti sistema ye similar al que se fixo nes playes pa los avisos y a un costu mui pequeñu desendolcóse un bon trabayu de normalización y presencia del idioma.

Tamién te podria gustar