Iniciativa reclama la equiparación de l’ALLA coles demás Academies del Estáu

Iniciativa pol Asturianu vieno acabante reclamar otra vuelta la equiparación de l’Academia de la Llingua col restu d’academies nos Presupuestos Xenerales del Estáu, depués de que namái se presupuesten 40.000 euros de sofitu pala Academia de la nuesa llingua frente a siete veces más que recibe l’Academia Galega.

Iniciativa  reivindica esti aumentu p’avanzar na igualdá del asturianu respective al restu de llingües españoles, por ser amás  una reivindicación hestórica de la organización y siendo’l segundu añu qu’apaez nes cuentes del Gobiernu central.

El proyectu de Presupuestos Xenerales del Estáu (PXE) pal añu 2022 vuelve a recoyer una partida de 40.000 euros pa l’Academia de la Llingua Asturiana (ALLA). La inclusión d’esti conceptu nes cuentes d’anguaño consiguióse dempués de dellos años de reivindicación d’Iniciativa pol Asturianu a los partíos asturianos con representación parllamentaria nes Cortes Xenerales. Los representantes asturianos de PSOE, PP, Podemos, IX y Foro siempres sofitaron esta propuesta, anque nun se materializó hasta l’añu pasáu.

A pesar de la bona noticia que supón la consolidación d’esti conceptu nos Presupuestos Xenerales del Estáu, Iniciativa pol Asturianu reclama l’incrementu de la partida de financiación estatal pa l’ALLA hasta equiparala col restu d’academies del Estáu. Nesi sen, hai que recordar qu’otres instituciones como la Real Academia Galega reciben un importe mui superior, multiplicando por siete la partida pa la institución asturiana. Agora que la financiación estatal pa l’ALLA ta afitada nos PXE ye’l momentu d’avanzar nel camín de la igualdá del asturianu col restu de llingües d’España.

Iniciativa pol Asturianu recuerda que n’otres comunidaes como Galicia foi’l PP l’encargáu de llevar la respectiva reclamación sobre la financiación de la so institución de la llingua propia, ello ye, la Real Academia Gallega. Por ello, Iniciativa pol Asturianu fai un llamáu a tolos partíos con representación parlamentaria a reclamar esta subida ya consiguir trabayar y avanzar na igualdá ente les llingües españoles.