Iniciativa quier animar al conceyu ayerán a visibilizar la llingua

Iniciativa quier animar al conceyu ayerán a visibilizar la llingua
10 xineru 12:22 2020 Imprimir

Iniciativa pol Asturianu vieno acabante d’espublizar esti día una nota de prensa na qu’anima al conceyu d’Ayer a facer un esfuerciu pa la presencia y normalización del asturianu nesti añu 2020 porque “la presencia del asturianu na páxina web institucional del Conceyu ye inexistente”. La organización anima a facer presente l’idioma n’otros espacios como ye’l casu del Centru d’Interpretación de la Vía Carisa onde nun se cumple la toponimia oficial.

Felicitas Fernández, secretaria d’Iniciativa pol Asturianu, fizo unes declaraciones esti día pa reclamar al Conceyu d’Ayer una mayor presencia de la llingua asturiana. La representante de la organización comentó que “invitamos al Gobiernu d’Ayer a facer un esfuerciu pa consiguir una presencia que faiga normal l’usu del asturianu nel conceyu. Dende Iniciativa pol Asturianu creemos que puede ser un bon oxetivu en materia llingüística pa esti añu 2020 pal gobiernu municipal”.

La entidá propón modificar la páxina web del conceyu pa que l’asturianu tamién tea disponible como nes páxines municipales d’otros conceyos averaos onde l’idioma tien una presencia digna y plantega la posibilidá de valorar l’usu del propiu topónimu (Ayer) na dirección web y nes redes sociales del conceyu. Fernández comentó que “nun hai presencia de la toponimia tradicional que ye oficial dende l’añu 2008”.

Amás, dende Iniciativa pol Asturianu s’anima a los responsables del Gobiernu Ayerán a facer usu de la toponimia tradicional en tolos espacios. Nesi sentíu, la organización denuncia que nel Centru d’Interpretación de la Vía Carisa nun hai presencia del asturianu y de la toponimia oficial. La representante de la organización acaba diciendo que “ye importante facer un esfuerciu pa consiguir una presencia normal y digna del asturianu y dir faciendo tamién un usu normal de los topónimos oficiales”.

Loading Facebook Comments ...