Iniciativa presentó’l programa del II Seminariu “Oficialidá”

by redacción asturnews | mayo 14, 2019 3:33 pm

Iniciativa pol Asturianu vieno acabante presentar esti martes 14 el programa del II Seminariu “Oficialidá, el camín constitucional de futuru pal asturianu”. Esti II Seminariu que va inaugurar Santiago García Granda, rector de la Universidá d’Uviéu, tien programaes varies meses redondes, l’estrenu del documental “El valor económicu d’una llingua” y ponencies de Leopoldo Tolivar Alas y Víctor Manuel Vázquez Portomeñe, ex conseyeru del Gobiernu del PP de Galicia.

El Seminariu va acabar con una semeya colectiva baxo’l lema “La sociedá asturiana axúntase pola oficialidá” nel patiu del Edificiu Hestóricu de la Universidá d’Uviéu nel que representantes de la sociedá asturiana van sofitar la oficialidá del asturianu.

Inaciu Galán, presidente d’Iniciativa pol Asturianu, y Sabel Tuñón, vocal de voluntariáu de la organización, dieron una rueda de prensa esti martes na que presentaron el programa completu del II Seminariu “Oficialidá, el camín constitucional de futuru pal asturianu” qu’entama Iniciativa pol Asturianu esti vienres 17 de mayu y el sábado 18 de mayu nel Edificiu Hestóricu de la Universidá d’Uviéu.

Dientro del II Seminariu que va inaugurar Santiago García Granda, rector de la Universidá d’Uviéu, tán programaes varies meses redondes (una d’elles con representantes políticos de los partíos que tuvieron responsabilidá de gobiernu, otra con empresarios y profesionales qu’utilicen l’asturianu na so llabor comercial, con trabayadores de los servicios de normalización, con representantes de sindicatos del sistema educativu, y otra mesa con periodistas). Amás, dientro de la primera xornada, va presentase un nuevu documental baxo’l títulu “El valir económicu d’una llingua” sobre diferentes empreses qu’usen l’asturianu nos sos productos o servicios y nel que van falar tamién economistes desplicando los beneficios que supondría la oficialidá de la llingua asturiana.

Tamién hai que destacar les ponencies de Leopoldo Tolivar Alas y Víctor Manuel Vázquez Portomeñe, ex conseyeru del Gobiernu del PP de Galicia que va aportar una visión interesante sobre’l desarrollu de la oficialidá na comunidá vecina.

El Seminariu va acabar con una semeya colectiva baxo’l lema “La sociedá asturiana axúntase pola oficialidá” nel patiu del Edificiu Hestóricu de la Universidá d’Uviéu nel que representantes de la sociedá asturiana van sofitar la oficialidá del asturianu.

Source URL: http://asturnews.com/iniciativa-presentol-programa-del-ii-seminariu-oficialida/