Portada Comunicación Iniciativa presenta con otres organizaciones el manifiestu ‘Pluralidá llingüística’

Iniciativa presenta con otres organizaciones el manifiestu ‘Pluralidá llingüística’

by redacción asturnews

Iniciativa pol Asturianu vieno acabante presentar esti martes na capital del estáu xunto con otres organizaciones el manifiestu Pluralidá llingüística: Llibertá, igualdá y democracia, aprovechando pa reclamar una solución pal profesoráu d’asturianu que vive nuna situación d’interinidá y precariedá pola falta de la especialidá docente.

Iniciativa pol Asturianu participó esti martes pela mañana na presentación del manifiestu Pluralidá llingüística: Llibertá, igualdá y democracia xunto con otres organizaciones de reivindicación llingüística d’España. El documentu encamienta al nuevu Gobiernu a tomar midíes necesaries nesta recién estrenada llexilatura pa garantizar la diversidá llingüística, la llibertá y la igualdá.

Na presentación del manifiestu, el presidente d’Iniciativa pol Asturianu, Iván Llera, aprovechó pa denunciar la situación del profesoráu d’asturianu que vive nuna situación d’interinidá y precariedá pola falta de la especialidá docente. El cabezaleru de la entidá recordó que “esta ye una situación inxusta y que tien una solución fácil, que ye la modificación del decretu d’especialidaes”.

Otra de les reivindicaciones d’esti manifiestu ye la d’oficializar les llingües d’España qu’entá nun lo son. Nesi sen, Llera llamó a siguir caminando nel consensu constitucional pola oficialidá, recordando que tamién l’aragonés vive una situación asemeyada a la del asturianu de falta de reconocencia oficial, xunto a otres llingües, que siendo oficiales nunos territorios, nun lo son n’otros.

Amás, Llera aprovechó pa denunciar “l’incumplimientu de la toponimia per parte del Estáu nes carreteres asturianes. El Gobiernu d’España nun se puede escudar na falta d’oficialidá pal usu de los nomes que son oficiales según los decretos correspondientes”.

Iván Llera dixo que “aprovechamos p’aconceyar con representantes de diferentes partíos políticos a los que treslladamos cuestiones como la propia toponimia y usu del asturianu nes carreteres estatales, en RENFE y l’aeropuertu, presupuestu pa l’ALLA; la especialidá docente, programación en llingua asturiana en RTVE y RNE y una presencia real del multillingüismu en TVE; presencia del asturianu en páxines web institucionales, propuesta d’añadir l’apartáu de llingües protexíes estatutariamente, amás de les oficiales, a los Premios Nacionales, ayudes y otres convocatories; la posibilidá del establecimientu del DNI billingüe y de cara’l futuru la creación d’un departamentu del gobiernu pa politica llingüística como una Secretaría d’Estáu de Política Llingüística”.

Iván Llera, presidente d’Iniciativa pol Asturianu, xunto con Inaciu Galán, vocal de rellaciones institucionales, visitaron a les senadores María Jesús Álvarez, María Fernández, Mª Mercedes Otero; el diputáu Roberto García Morís y el voceru axuntu del grupu parllamentariu del PSOE nel Congresu, Guillermo Meijón. Tamién aconceyaron cola diputada Sofía Castañón de Xuníes Podemos, Paloma Gázquez del Grupu Parllamentariu Popular y col diputáu Isidro Martínez Oblanca de Foru Asturies.

Tamién te podria gustar