Iniciativa pol Asturianu sofita’l manifiestu sobro la RTPA

Iniciativa pol Asturianu sofita’l manifiestu sobro la RTPA
24 setiembre 13:22 2020 Imprimir

Iniciativa pol Asturianu vieno acabante espublizar una nota de prensa na que sofita’l manifiestu “Por una RTPA al serviciu de la cultura asturiana”, coincidiendo  en qu’agora más que nunca ye’l momentu de que la RTPA dea pesu a la llingua asturiana”.

Iniciativa pol Asturianu quier facer públicu’l so sofitu al manifiestu “Por una RTPA al serviciu de la cultura asturiana”, qu’apaeció güei cola firma de más de 100 personalidaes vinculaes a la cultura asturiana, reclamando una mayor y meyor atención a la cultura y la llingua asturianes nos medios de comunicación públicos. Dende Iniciativa pol Asturianu coincidimos na necesidá remarcada por esti grupu d’escritores, músicos, editores, promotores… reclamando “una presencia digna, global y permanente de la cultura asturiana na RTPA”.

El manifiestu fai un llamáu pa que s’apueste por «dignificar la presencia de conteníos culturales y musicales del país (mui especialmente n’asturianu y gallego-asturianu) na programación, con un tratamientu dignu, global y permanente nella».
Dende Iniciativa pol Asturianu llevamos años reclamando estes mesmes llinies de trabayu na RTPA y yá fiximos llegar a les fuercies polítiques y a la propia dirección del Ente la necesidá d’afitar esti llabor al traviés de les bases que tienen de rexir el funcionamientu de la RTPA, qu’han marcase al traviés del Mandatu marcu, pendiente d’aprobar na Xunta Xeneral d’Asturies.

La nota d’Iniciativa fai alcordanza de que nel 2016 “presentemos Una RTPA pa la próxima década. Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu, que sigue vixente, yá que la mayor parte de los pasos plantegaos siguen ensin cumplise. Coincidimos en qu’agora más que nunca ye’l momentu de que la RTPA dea estos pasos y agradecemos a toles personalidaes firmantes d’esti manifestu’l so sofitu a unes midíes más que necesaries pal desenvolvimientu d’una radiotelevisión al serviciu d’Asturies y la so cultura, como demanda la sociedá asturiana”.

  Categories:
Loading Facebook Comments ...