Iniciativa pol Asturianu recuerda que nun recibió nin un euru de fondos públicos

Iniciativa pol Asturianu recuerda que nun recibió nin un euru de fondos públicos
17 abril 12:18 2018 Imprimir

Iniciativa pol Asturianu recuerda que nun recibió nin un euru de fondos públicos dende la so fundación en 2011, contestando a les acusaciones del “grupu d’estrema drecha” sobre la procedencia de los sos fondos. Iniciativa estudia si puen constituyir base pa una demanda xudicial.

Tres de les acusaciones llanzaes nos medios dende un grupu venceyáu al partíu d’ultradrecha VOX, na que se reclama a delles entidaes, ente elles a Iniciativa pol Asturianu, “una auditoría de los fondos públicos gestionados”, quieren recordar que la  entidá nun solicita nin recibe nenguna ayuda pública dende la so fundación nel añu 2011, polo que recuerden que nos cuasi siete años d’actividá nun recibimos nin un euru de perres públiques en forma d’ayuda, sovención o cualesquier otra forma d’ingresu.

La ONG Iniciativa pol Asturianu quier recordar que ye una entidá que realiza les sos actividaes como asociación gracies a les aportaciones de los cientos de socios y socies que paguen cada añu les sos cuotes, asina como gracies al llabor de voluntariáu de munches persones que los ayuden en toles actividaes que facemos.

La plataforma ultraderechista que llanzaba estos díes l’acusación citaba a Iniciativa pol Asturianu como una entidá “sostenida con fondos públicos”, polo qu’estudien la posibilidá de tomar acciones llegales por estes afirmaciones, que son falses a sabiendes, yá que lleven años dando a conocer nes nuesos perfiles en redes y páxina web que son una
entidá sostenida con un 0% de fondos públicos, polo que yera conocío por esta entidá que facíen una falsa acusación.

Quieren tamién recordar que, “magar que la nuesa llinia de trabayu ye la de nun solicitar ayudes públiques, por mor de que la nuesa filosofía ye la de caltener la independencia absoluta de les instituciones y la implicación de la sociedá civil nel sostenimientu del llabor pol idioma, nun tenemos nada en contra de les ayudes públiques que reciben otres entidaes, y qu’estes tán yá fiscalizaes poles instituciones públiques. Ha recordase amás, que l’Academia de la Llingua Asturiana, a la que tamién acusen nesti nuevu ataque de la estrema drecha al asturianu, nun ye una entidá privada, sinón que ye una entidá pública que forma parte de la estructura del Gobiernu del Principáu d’Asturies, magar que tenga un funcionamientu autónomu”.

Estes acusaciones falses “son un ataque a la desesperada d’esti grupu contrariu al asturianu y a la cultura d’Asturies nun momentu nel que ven como los consensos sociales y políticos fae irreversible la oficialidá del asturianu, una midida que nun ye más que la Igualdá de drechos pa tolos asturianos y asturianes”.

  Categories:
Loading Facebook Comments ...