Iniciativa pol Asturianu reclama la Oficilidá en Uesca

Iniciativa pol Asturianu reclama la Oficilidá en Uesca
25 xunetu 15:31 2015 Imprimir

Inaciu Galán desplicó la situación de la llingua asturiana nel Conceyu de l’Asociación de Llingües Amenazaes

Inaciu Galán, presidente d’Iniciativa pol Asturianu, faló esti vienres énte los más de setenta delegaos d’organizaciones en defensa de llingües d’Europa dientro del XXIV Congresu de Llingües y Cultures Europees Amenazaes, en Uesca. Galán esplicó la situación del idioma en distintos ámbitos nos que les alministraciones son responsables de la situación de peligru de desapaición del asturianu, talos como los medios de comunicación públicos, el procesu de recuperación de la toponimia, el sistema educativu y sobre too, la falta d’un estatus llegal pal idioma qu’otorgue la plena igualdá xurídica a los falantes d’asturianu, gallego-asturianu y castellán, que como esplicó “ha pasar pola reconocencia de la oficialidá nel Estatutu d’Autonomía”.

Alredor de la presencia de la llingua nel sistema educativu, Iniciativa pol Asturianu denunció los recortes en Bachilleratu, onde l’asignatura pasará de cuatro hores a una selmanal esti cursu próximu, asina como la falta d’aiciones pa consiguir un sistema educativu que garantice la tresmisión xeneracional de la llingua asturiana lo qu’en pallabres d’Inaciu Galán “pasa per un sistema onde l’asturianu seya una llingua más del currículu, pa tolos alumnos y cola posibilidá de tener parte de les materies col asturianu como llingua vehicular”.

Galán,. tamién reclamó que l’asturianu tenga una meyor presencia na radiotelevisión autonómica, onde Galán comentó como “falten programes n’asturianu en cuestiones clave, como la programación infantil, los informativos, el deporte y el doblaxe de ficción” recordando que proyectos como Alderiques d’Asturies, entamaos col puxu d’Iniciativa pol Asturianu “demuestren que ye posible facer una televisión n’asturianu con toa triba de conteníos”.6859

Iniciativa pol Asturianu faló tamién de la participación d’esta organización na sesión de control a España del Altu Comisionáu de Drechos Humanos de la ONX, que va sirvir pa tomar aiciones y solicitar sanciones al gobiernu d’España y al d’Asturies polos incumplientos llexislativos en materia llingüística que se dan n’Asturies.

La presencia del asturianu xeneró bien d’interés nos representantes internacionales mesmo na conferencia d’Inaciu Galán, que nel puestu informativu y d’esposición de llibros y otros productos culturales n’asturianu que pudo vese a lo llargo del congreso.

L’alcuentru entamáronlu’l Consello d’a Fabla Aragonesa y ALCEM (Asociación poles Llingües y Cultures Europees Amenazaes) a los qu’Iniciativa pol Asturianu quier felicitar pola bona organización y pola repercusión que tán teniendo en medios de toa Europa les reivindicaciones de les llingües minorizaes.

  Categories:
Loading Facebook Comments ...