Portada Política Iniciativa pol Asturianu reclama al PSOE que tenga en cuenta al asturianu na so proposición sobre llingües

Iniciativa pol Asturianu reclama al PSOE que tenga en cuenta al asturianu na so proposición sobre llingües

by redacción asturnews
Collage de cartelos de cursos d'asturianu d'Iniciativa

Iniciativa pol Asturianu dirixóse a la organización socialista pa qu’esta tenga en cuenta la llingua del Principáu d’Asturies na so proposición sobre llingües.

Sigún la organización civil, el PSOE ta trabayando nuna proposición de llei que tien l’envís de da-y puxu a les llingües oficiales del Estáu en tolos ámbitos de l’alministración y  grandes empreses. Poro, Iniciativa pol Asturianu ta reclamando al partíu estatal que la llingua de los asturianos seya tenida en cuenta nesa propuesta llexislativa pues gocia d’un marcu de proteición que nun tien porque ser escluyente pa esta proposición.

La entidá comparte dafechamente la declaración de los autores d’esta proposición de llei, onde se diz testualmente que “el fortalecimientu de cualquiera de les llingües españoles nun va en desterciu de les otres. Nun tien por qué esistir, y ye un erru decilo neses pallabres, una competición ente llingües, un xuegu de suma cero”.

Cabe traer a l’arcoldanza, la Llei 1/98 del 23 de marzu, d’Usu y Promoción del Asturianu, concretamente nos artículos 1, 2, 3 y 4 del capítulu I de la mesma, onde se diz lliteralmente que: “L’asturianu como llingua tradicional d’Asturies, gociará de proteccion. El Principáu d’Asturies promoverá’l so usu, difusión y enseñu” y qu’amás Tolos ciudadanos tienen derechu a emplegar el bable/asturianu y a esplicase nelli, de palabra y per escrito [n’alminsitración]”. Polo que’l gobiernu asturianu ta en disposición d’informar y facer cumplir la llei a toles alministraciones comunitaries

Sigún Iniciativa, “la llingua de de la nuesa comunidá gocia d’un marcu de proteición, lo que fai que la sociedá civil asturiana tea en condiciones d’esixir que s’aplique la llei y qu’ésta se tenga en cuenta en casu de que s’amplien les condiciones de la mesma”. Nesti sen, Iniciativa pol Asturianu va tar ehí reivindicando esta situación, al empar qu’ufiertando la so collaboración y trabayu en casu de que puedan necesitalo.

Tamién te podria gustar