Iniciativa pol Asturianu recalda fondos con un actu nel que se presenta Formientu 9

La revista Formientu va despidir l’añu y a dellos de los sos autores más vieyos nun actu que se va celebrar nel chigre L’Ayalga, de Xixón, esti xueves 29 d’avientu de magar les 8 la tarde. L’actu va servir tamién pa recaldar fondos pa l’asociación Iniciativa pol Asturianu, de recién creación, pues tolos ingresos pola venta de revistes que se faigan esi día van tar destinaos al llabor d’esta asociación, que collabora cola organización del actu.

Xareos! Xestión Cultural espublizó va dellos meses un númberu nuevu de la revista de lliteratura “mui” moza, Formientu, que cumplió 5 años apocayá, con dos númberos añales saliendo al mercáu lliterariu. “Y dempués de cinco años llegaba’l momentu de dicir adiós a dalgunos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos”, espliquen dende la revista.

Y ye que los editores de la revista “La renovación xeneracional ye imprescindible nuna publicación d’estes característiques, pues ye la so esencia mesma”.

Por ello dende’l númberu viniente, el 10, namás van poder espublizar testos los autores ñacíos dende 1980 n’adelantre, tarazando cinco años la edá máxima permitida pa la publicación nesta revista “mui moza”.

Nesti númberu Xareos! apurre otra novedá al llector. Estrénase la estaya de crítica. Na revista esplícase que costó, pero que, por fin, “dalgún autor mozu animóse a abrir camín nesta abegosa xera de la crítica y equí ta’l resultáu qu’esperemos que tenga continuidá en númberos próximos”.

Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».

Formientu ta dirixida por Inaciu Galán y el so Conseyu de Redacción ta formáu pol escritor Benxa Pérez y el director, coordinaos pola escritora y filóloga Laura Marcos.

Actu de recaldación de fondos pa Iniciativa pol Asturianu