Iniciativa pol Asturianu presenta los problemes de la llingua nel XXIV Congresu de Llingües y Cultures Europees Amenazaes

Iniciativa pol Asturianu presenta los problemes de la llingua nel XXIV Congresu de Llingües y Cultures Europees Amenazaes
22 xunetu 15:25 2015 Imprimir

El congresu entama esti xueves 23 en Uesca

Iniciativa pol Asturianu va presentar esta selmana los problemes de la llingua asturiana nel XXIV Congresu de Llingües y Cultures Europees Amenazaes que celébrase nesta ocasión en Uesca cola participación d’entidaes en defensa de llingües de toa Europa. Inaciu Galán, presidente d’Iniciativa pol Asturianu va participar, ente los díes 23 y 25 de xunetu, nes actividaes del XXIV Congresu de Llingües y Cultures Europees Amenazaes en Uesca, nesti alcuentru que ta entamáu pol Consello d’a Fabla Aragonesa y ALCEM (Asociación poles Llingües y Cultures Europees Amenazaes) y qu’Iniciativa pol Asturianu considera una oportunidá más nel so trabayu pa dar a conocer la situación de la llingua asturiana en foros internacionales, como yá realizó nel pasáu n’Oxford o Barcelona, ente otros llugares.

Ente les actividaes de la presencia d’Iniciativa pol Asturianu, una conferencia titulada “Asturianu SOS: una güeyada sobre la situación de la llingua asturiana y les sos perspectives de futuru”, na que se va falar de la situación de peligru que vive l’asturianu y la falta d’un estatus llegal fayadizu, “que tendría solución cola reforma del Estatutu d’Autonomía y la inclusión de la oficialidá de la llingua asturiana”.

L’oxetivu d’esti Congresu internacional ye llamar l’atención sobre les llingües amenazaes, tanto ante la sociedá como ante les autoridaes competentes; dar a conocer la situación pola que pasen delles llingües amenazaes d’Europa; estrechar los venceyos ente los representantes, falantes y estudiosos de distintes llingües minoritaries europees; deprender de les acciones implementaes n’otres llingües; trabayar a comuña pola reconocencia, la dignificación y la promoción de les llingües amenazaes, tratando d’evitar la so desapaición y procurando el so mayor usu y la so mayor conocencia; y, por supuestu, “aprovechar pa reivindicar acciones positives de política llingüística pa toles llingües amenazaes, cuantimás pa les llingües peninsulares qu’inda nun son oficiales, casu del asturianu y aragonés, que son les llingües con mayor riesgu de desapaición nel estáu español”.

Hai menos d’un mes Iniciativa pol Asturianu presentó la situación del idioma ante l’Altu Comisionado de Derechos Humanos de la ONU y esta esperiencia va ser tamién rellatada nel Congresu, onde la organización asturiana va participar tamién con una amuesa de llibros asturianos dientro del “Escaparate de les llingües amenazaes” que se va celebrar nes antoxanes de la Diputación de Uesca.

Una conferencia de Roberto González-Quevedo, secretariu de l’Academia de la Llingua Asturiana y presidente d’ALCEM, va completar la presencia asturiana en estre congresu.

  Categories:
Loading Facebook Comments ...