Iniciativa pol asturianu participa activamente na manifestación

07 mayu 04:49 2014 Imprimir

Esti vienres 9 de mayu la sociedá asturiana vuelve a salir a la cai por mor del Día de les Lletres Asturianes pa reclamar la oficialidá del asturianu y dende Iniciativa pol Asturianu tornen a sofitar un añu más esta manifestación, participando de la marcha y unes hores enantes, dende les cinco la tarde, con un repartu informativu na Plaza la Escandalera, pa dar a conocer l’asociación y la situación del asturianu, al tiempu que llamen a la sociedá a participar na convocatoria.

La Manifestación pola Oficialidá va salir el vienres 9 de mayu a les 19:30 hores de la Estación del Norte d’Uviéu. Animamos a toles persones enfotaes nel futuru del idioma a participar con nós nesti actu festivu y reivindicativu que llenará les cais de la capital asturiana.

Iniciativa pol Asturianu, nuna nota de prensa espublizada esti día na so web, “quier facer un llamáu a la sociedá pa participar nesta reivindicación, organizada pola Xunta pola Defensa de la Llingua Asturiana y perimportante pal futuru d’Asturies y de la so cultura. El trabayu reivindicativu dio los sos frutos esti añu con dellos pasos alantre, positivos pero insuficientes dafechu. Ye por ello que ye importante reforzar el llabor reivindicativu ya implicar a cada vegada más xente”.

Iniciativa pol Asturianu ye una organización que “ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial”.

Na nota asoleyada con motivu la manifestación del vienres, la organización diz que “anque ye verdá que la oficialidá nun ye una varina máxica que vaiga solucionar tolos problemes del idioma d’una vegada, pero sí ye imprescindible pa que’l procesu de recuperación del asturianu pueda llevase alantre”.

Iniciativa pol Asturianu recuerda tamién que dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre polo qu’anima a la xente a participar d’esti actu de sofitu a la institución.

  Categories:
Loading Facebook Comments ...