Iniciativa pol Asturianu llamenta la muerte del poeta Pablo Ardisana

Iniciativa pol Asturianu llamenta la muerte del poeta Pablo Ardisana
03 abril 18:21 2017 Imprimir

Na madrugada del domingu al llunes finaba Pablo Ardisana, poeta n’asturianu consideráu ente los contemporáneos de más calidá, con obres como Armonía d’anxélica sirena (1986) y Azul mirar d’amor (1989) y esti llunes delles organizaciones de defensa del idioma, con Iniciativa pol Asturianu en primer llugar llamentaron la noticia.

Como facía alcordanza Iniciativa na so nota de prensa, Ardisana apaeció en revistes como Lletres Asturianes y nes antoloxíes más prestixoses de la lliteratura asturiana de les últimes décades. En 2009 ún de los sos poemes foi musicáu pola compositora Carla Armas, poniéndo-y música’l Conservatoriu Superior de Música de Salamanca. Una esperiencia que nun foi única pues el grupu Llan de Cubel tamién musicó la so obra.

Ardisana impulsó a lo llargo la so vida iniciatives culturales y sociales nel so conceyu, como’l Certame de poesía Santa Rita, en Cardosu, nos años noventa. Un certame qu’esti añu va recuperase con una tercer edición que l’autor yá nun podrá ver. L’antoloxía de José Luis Arguelles, “Toma de Tierra” foi la cabera apaición del autor en llibru impresu, allá pel 2010.

Dende Iniciativa pol Asturianu llamenten esta perda, la d’una persona comprometida cola so llingua, y acompañamos a la familia y amistaes d’Ardisana nel dolor.

  Categories:
Loading Facebook Comments ...