Iniciativa pol Asturianu fina’l domingu la votación popular pa escoyer la ‘Meyor noticia pal asturianu en 2019’

Iniciativa pol Asturianu fina’l domingu la votación popular pa escoyer la ‘Meyor noticia pal asturianu en 2019’
07 xineru 14:44 2020 Imprimir

Iniciativa pol Asturianu va finar esti vienres la votación popular pa escoyer la ‘Meyor noticia pal asturianu en 2019’, propuesta que’estrenó nel añu 2013 y que cada añu que pasa va medrando’l númberu de participantes y la cantidá de noticies positives pal idioma.

Iván Llera, presidente d’Iniciativa pol Asturianu, presentó la selmana pasada la campaña ‘Meyor noticia pal asturianu en 2019’ cola que la organización pretende escoyer, pente medies d’una votación popular, la meyor noticia pa la llingua asturiana nel pasáu añu 2019.

Llera comentó que “esta iniciativa estrenóse nel añu 2013 y cada añu que pasa va medrando’l númberu de participantes y la cantidá de noticies positives pal idioma. Tamién val pa facer un repás a tola llabor d’Iniciativa pol Asturianu y pa comprobar como añu a añu la llingua asturiana tien una repercusión postivia nos medios. Esti añu vimos como l’asturianu tuvo presente nun actu del Instituto Cervantes en París, apaeció’l primer xuegu de rol n’asturianu o l’aprobación del decretu pa les pruebes d’asturianu nel Marcu Européu de Referencia pa les Llingües”.

El presidente d’Iniciativa pol Asturianu señaló que “con esta campaña pretendemos facer llegar a los asturianos y a les asturianes delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2019 pal asturianu y treslladar que la llingua asturiana va ganando presencia nes instituciones y normalidá na sociedá”.

Iván Llera terminó diciendo que “los y les participantes pueden escoyer ente un total de 18 bones noticies pal asturianu de diferente tipu, pudiendo seleccionar hasta 8 al mesmu tiempu”. La votación entamó’l vienres 3 de xineru y va acabar el domingu 12 d’esti mes.

Enllaz a la votación.

Loading Facebook Comments ...