Iniciativa pol Asturianu felicita a los diputaos de Podemos

Dende Iniciativa pol Asturianu quieren felicitar nun comunicáu asoleyáu na tarde del miércoles a Sofía Castañón y Segundo González “por facer sonar la llingua asturiana nel parllamentu estatal, nel que les llingües diferentes del castellán nunca son bien recibíes”.

Pala organización de defensa del idioma “esti xestu permite da-y visibilidá a la realidá llingüística d’Asturies nel ámbitu estatal y poner sobre la mesa política del Estáu, la necesidá de da-y una solución en plena igualdá llegal col restu de les llingües d’España, al usu del asturianu”.

A estos dos diputaos, y al restu de los que representen a Asturies nel Congresu y el Senáu que güei entamaron les sos sesiones, Iniciativa píde-yos “que trabayen por un consensu que xenere les necesaries reformes, n’Asturies y en Madrid, pa da-y a la llingua asturiana l’estatus d’oficialidá que yá tienen dende va más de trenta años les demás llingües del estáu. Pueden amás trabayase pasos alantre en cuestiones nes que la falta d’oficialidá nun ye una torga absoluta, como l’usu y la promoción del asturianu per parte de les instituciones del estáu central”.

Dende Iniciativa pol Asturianu esperen qu’esta llexislatura signifique un tiempu de pasos alantre pal asturianu tamién nel ámbitu del Gobiernu d’España, que si bien nun ye’l primer responsable del idioma (a esi hai que buscalu nel Gobiernu d’Asturies), sí que tien un ampliu marxe pa tomar midíes que meyoren la situación del idioma.