Iniciativa pol asturianu fai alcordanza de la importancia del asturianu na RTPA

Iniciativa pol asturianu fai alcordanza de la importancia del asturianu na RTPA
04 00:14 2017 Imprimir

Iniciativa pol asturianu vieno acabante facer alcordanza de la importancia que tien la presencia delasturianu na RTPA como ya destacó va un añu na presentación del informe sobre’l Mandatu marcu pa la viniente década.

Iniciativa pol asturianu presantara va un añu nuna rueda de prensa “Una RTPA pa la próxima década.Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu”. Un documentu col que buscaben, en pallabres d’Inaciu Galán, presidente de la organización “apurrir propuestes pa da-y utilidá social a la RTPA nos vinientes diez años, convirtiéndola nuna ferramienta eficaz na tresmisión del asturianu y na vertebración d’Asturies”.

Quier recordase l’informe nesti momentu nel que se ta discutiendo la presencia del asturianu na RTPA y se ta volviendo a poner en marcha la redacción del Mandatu marcu de la RTPA dientro de los trabayos de la Xunta Xeneral ya inclúi propuestes d’acción pa facer una parrilla televisiva que tenga una presencia tresversal del asturianu. Galán recordó que “foi l’asturianismu quien siempres tuvo ente los sos oxetivos cuntar con una radiotelevisión pública asturiana” y qu’agora les propuestes “faense col envís de da-y viabilidá a esti proyectu, que de siguir na llinia actual pue tener un difícil sostenimientu nel futuru”.

Fonsu Martín, vocal d’Enseñu d’Iniciativa pol Asturianu, tamién faló naquella rueda de prensa, y esplicó como “la presencia del asturianu na radiotelevisión pública, n’especial nos programes infantiles y xuveniles pue convertise nuna ferramienta bien potente que complemente al llabor nes escueles y ayude a recuperar o reforciar la tresmisión interxeneracional del idioma, en definitiva, a da-y futuru”.

Los puntos clave seríen los siguientes:
• Reconocer como una de les misiones del serviciu públicu audiovisual n’Asturies la de normalizar socialmente l’asturianu. La única manera de normalizalu ye ufiertar conteníos de calidá en tolos xéneros y formatos, con corrección llingüística, adecuadamente promocionaos y n’horarios afayadizos pa esos finxos.
• La RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y formatos, qu’han ser adecuadamente promocionaos y emitíos n’horarios afayadizos pa esti fin; afalando, de pasu, una industria audiovisual propia que garantice la producción d’estos conteníos y asumiendo un rol compensatoriu respectu a otres cadenes públiques o privaes. RTPA tien que ser exemplar nel so compromisu colos elementos fundamentales y actuales de la cultura asturiana, renunciando a siguir les dinámiques propies de los otros medios de comunicación con presencia n’Asturies.

Esta ye la única forma qu’entendiere la entidá de defensa del idioma de llograr la necesidá de consiguir una radiotelevisión al altor de les circunstancies sociollingüístiques d’Asturies: “Una RTPA que seya útil pa recuperar l’autoestima de los asturianos y les asturianes al rodiu de la so llingua y cultura propies. Tenemos la oportunidá de camudar la situación de la RTPA al traviés d’esti nuevu Mandatu marcu, que va afitar la forma de trabayar la próxima década. Nun podemos dexar pasar esta oportunidá hestórica pal asturianu, p’Asturies y pal propiu Ente”.

  Categories:
Loading Facebook Comments ...