Iniciativa pol Asturianu esixe informativos n’asturianu na TPA

Iniciativa pol Asturianu esixe informativos n’asturianu na TPA
19 ochobre 11:16 2017 Imprimir

Iniciativa pol Asturianu esixe que se ponga en marcha un informativu n’asturianu na TPA y súmase asina a la protesta de l’ALLA pola probe presencia del asturianu na RTPA, reclamando a Atonio Virgili que, si nun tien voluntá, dimita como director de la RTPA.

Dende Iniciativa pol Asturianu quieren reclamar de nuevo que se ponga en marcha un informativu diariu n’asturianu. Amás, queremos amosar el nuesu sofitu a l’Academia de la Llingua Asturiana, que col oxetivu de cumplir la llei y de normalizar l’usu del asturianu na sociedá vieno calteniendo conversaciones a lo llargo de los últimos años col Direutor de la RTPA con un resultáu que la institución califica de “frustrante”.

Concretamente’l pasáu 17 de xunetu, l’ALLA presentó al Ente de comunicación autonómicu, ente otres, una propuesta pa entamar un espaciu informativu diariu n’asturianu que siguiría concretándose y falándose en setiembre. Conversación torgada pola negativa de Virgili que-yos diría que la normalización de la llingua asturiana ya taría amosada en programes como “Asturianaes”, “De folixa en folixa”, “Guía Chigrín” o la retresmisión n’asturianu de la “Misa dende la Cueva San Pedrín”.

“Esta respuesta de Virgili ye llamentable y demuestra la so falta de voluntá. L’asturianu tien d’usase de forma tresversal en tola programación, y lo contrario ye un pilancu pa les posibilidaes de dignificar la llingua asturiana na televisión asturiana”. Iniciativa ye contundente no que cinca a la responsabilidá de la direición del ente.

Amás, asegura que “como paez que mentanto’l Sr. Virgili seya Direutor de la RTPA la llingua asturiana nun tendrá espacios de dignificación nin normalidá nos medios públicos asturianos, pidimos la so inmediata dimisión, pa dar pasu a persones con más sensibilidá y comprometíos col cumplimientu de la Llei d’Usu del asturianu de 1998 qu’esplicita la obligación de promover l’usu del asturianu nos medios de comunicación”.

  Categories:
Loading Facebook Comments ...