Portada Educación Iniciativa pol Asturianu entama un taller básicu de teatru en Xixón

Iniciativa pol Asturianu entama un taller básicu de teatru en Xixón

by redacción asturnews

Iniciativa pol Asturianu abre esta selmana la matrícula pa un taller básicu de teatru que va poner el teatreru Sergio Buelga y va desenvolvese los sábados de 10 a 14 hores nel Conseyu de la Mocedá de Xixón a lo llargo de 35 hores.Esti taller  de 35 hores, va desendolcar distintes propuestes pa que, quien participe, puea contar con unes ferramientes básiques pa poder acarar, de forma afayaíza, una creación actoral propia, seya individual o coleutiva. La matrícula vieno acabantes d’abrise y va poer facese hasta’l 26 de marzu.

Les actividaes dirán empobinaes a desendolcar les diferentes téuniques actorales individuales (ortofonía y dicción,  comprensión de testos, declamación, espresión corporal, improvisación…) y dinámiques coleutives (escenificaciones, improvisación de métodu, dramatizaciones de testu, coru…), deteniéndose a trabayar con exemplos propios del fechu teatral asturianu

Sergio Buelga Casas (Xixón, 1979) ye monitor d’ociu y tiempu llibre. Miembru de la Compañía Asturiana de Comedias dende va más de diez años, como actor, ye, dende la última temporada, co-director escénicu. A lo llargo de cinco años desendolcó’l blogue d'”Un teatreru asturianu” que trataba de l’actualidá teatral n’Asturies, poniendo’l focu de forma especial na escena en llingua asturiana. En 2016, estrenóse la so obra “La máquina de retratar”, dempués d’algamar como escritor dellos certámenes dramáticos: “Dulce por Amargo” de la ESAD-Asturias,  Premiu de Teatru de l’ALLA, trés Premios “Aurora Sánchez” del Salón de Teatru Costumista de Candás y dos premios “Carlos Álvarez Novoa” de FETEAS. Tien espublizaes en papel les sos obres “La pita”, “L’abellugu” y “La herencia” y, n’imprenta, “El faru” y “La parada de los aristócrates”.

Tamién te podria gustar