Iniciativa pol Asturianu denuncia que se sigue torgando l’accesu a l’asignatura de Llingua Asturiana y anima a faer públicos los casos

Coincidiendo cola campaña de matriculación entamada pola Conseyería, dende Iniciativa pol Asturianu amuesen otra vuelta’l descontentu coles trampes que faen dende dellos centros educativos públicos y concertaos d’Asturies pa que l’alumnáu de Primaria y Secundaria nun escueya l’asignatura de Llingua Asturiana, nun duru comunicáu asoleyáu esti xueves.

Hebo yá va unos meses dellos problemes pa matricular l’asignatura en dalgunos centros, inclusive a la escontra de la sentencia del Tribunal Superor de Xusticia d’Asturies del añu 2010, que finó cola obligación d’un númberu mínimu d’ocho alumnos pa que se diere l’asignatura. Cola sentencia de va seis años les lleis recueyen que a cualesquier alumnu-y puedan poner clas de Llingua Asturiana ensin falta de que naide más tea interesáu na asignatura. Pesie a ello, dende la dirección de munchos centros concertaos y dalgunos públicos tán empeñaos en tapecer esti drechu falsiando los datos y diciéndo-yos a les families y al alumnáu que fai falta un númberu mínimu de matriculaos pa poner clas.

Va unos díes repitióse la hestoria otra vuelta: dende’l C.P. Buenavista II univiaron una circular a les families del alumnáu que pasa’l cursu que vien a Primaria informando de les condiciones nes que se da l’asignatura de Llingua Asturiana. Nesti documentu hai, pelo menos, dos falsedaes que dende Iniciativa pol Asturianu cuidamos tán cuntaes pa torgar les matrícules na asignatura d’asturianu. Per un llau, la dirección del centru diz que tien d’haber una matriculación mínima de 10 alumnos, argumentu falsu dafechu. Pel otru llau, el documentu informa a les families de que l’asignatura d’asturianu y la alternativa (Cultura Asturiana) danse en dos sesiones a la selmana de 45’ minutos caúna que tán sacaes d’asignatures d’otres arées llingüístiques y de Conocimientu del Mediu; aseveración falsa dafechu tamién teniendo en cuenta que l’asignatura d’asturianu lleva nes escueles de magar l’añu 1984 p’acá, polo que Llingua Asturiana lleva dándose alredor de venti años nes hores que-y pertenecen únicamente a l’asignatura de Llingua Asturiana.

Iniciativa pol Asturianu entiende qu’esti ye un casu más de tantos nos que’l deséu personal d’ún o varios cargos del equipu directivu d’un centru que ta financiáu con dineru públicu consiguen torgar los drechos fundamentales que tienen por llei tolos escolinos asturianos a recibir enseñu de la llingua propia si asina quieren ellos y les families. Dende la nuesa asociación condergamos esta mena d’actuaciones y encamentamos a los equipos directivos, al profesoráu, a les families, al alumnáu y a cualesquier otra persona que perteneza a la sociedá asturiana que denuncie ensin miramientos esti tipu d’acciones illegales como lo facemos nós. Tamién tenemos un encamientu especial pa que les entidaes pertinentes, como son la Conseyería d’Educación o los sindicatos, velen por esti drechu de tolos asturianos a formase na llingua de so