Iniciativa pol asturianu denuncia l’ausencia institucional de la llingua

Iniciativa pol asturianu denuncia l’ausencia institucional de la llingua
31 avientu 15:49 2015 Imprimir

Iniciativa pol Asturianu quier denunciar la llamentable situación del idioma que se ta viendo nestes feches dende toles instituciones, que nin siquier faen un usu simbólicu del idioma.

Nuna nota de prensa asoleyada esti día, en primer llugar, y como yá denunció la organización l’añu pasáu, “el xefe d’estáu, el Rei Felipe VI, nun felicitó les fiestes n’asturianu, como si fizo col restu de les llingües del Estáu nel discursu de Navidá”.

Esti fechu velu Iniciativa pol Asturianu especialemnte grave, pues l’añu pasáu y con esti motivu “punxímonos en comunicación cola Casa del Rei, pa denunciar esti fechu y recibimos una carta na que s’espresaba l’apreciu del Rei pola llingua asturiana. Sicasí, esti “apreciu” nun s’espeya en nengún usu del idioma pela so parte, nin nes visites a Asturies, nin n’usos simbólicos como la felicitación que fai nel restu de les llingües d’España al final del so discursu”.

Esta ye una “una nueva marxinación de la llingua asturiana frente al restu de llingües del Reinu per parte de la Casa Real y el Rei”, que nun sorprende cuando’l propiu Presidente d’Asturies, Javier Fernández, “usa catorce llingües pa felicitar les fiestes a los asturianos y asturianes, y nenguna d’elles ye l’asturiana”.

Por ello Iniciativa solicitaba esti día al Presidente que nel so discursu de Navidá  pela televisión autonómica nel día caberu del añu “use l’asturianu a lo menos en parte del mesmu. Sabemos que’l presidente suel espresase n’asturianu en priváu y nun somos quien a entender qué-y fai avergoñase d’usar l’asturianu, mientres el presidente de la comunidá vecina, Miguel Ángel Revilla, apaeció felicitando les fiestes con un villancicu n’asturianu. Nel discursu de Navidá tien una oportunidá Fernández pa reconciliase cola so llingua materna, y la llingua del territoriu que gobierna, y usala con normalidá”.

Loading Facebook Comments ...