Iniciativa pol Asturianu denuncia la maniobra política contra la normalización del asturianu en Noreña

Iniciativa pol Asturianu denuncia la maniobra política contra la normalización del asturianu en Noreña
25 xunetu 02:43 2016 Imprimir

Iniciativa pol Asturianu denuncia la maniobra política contra la normalización del asturianu en Noreña depués que la Delegación del Gobiernu d’España n’Asturies viniera d’anular la “Ordenanza pal usu del asturianu nel Conceyu de Noreña” al traviés d’una orde al Conceyu na que-y reclama qu’eche atrás esti testu y los sos efectos nel plazu d’un mes.

Informaos d’esta situación per parte de dellos grupos políticos de Noreña, en Iniciativa dicen que “nun podemos más que condergar esti ataque a l’autonomía de los conceyos pa establecer midíes de normalización del asturianu, tal y como afita la Llei d’Usu del asturianu de 1998 que nel puntu 1 del Artículu 8 diz que los ayuntamientos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies, lo que dexa a les clares la posibilidá de poner en marcha midíes, esactamente lo que se fai al traviés d’una ordenanza de normalización como la qu’agora quieren prohibir dende la Delegación dirixida por Gabino de Lorenzo”.

Esti nuevu ataque políticu contra l’asturianu del Partíu Popular “ye especialmente llamentable, pues usa ferramientes del Estáu y oculta cola apariencia d’una decisión xurídica lo que nun ye más qu’un nuevu intentu de da-y un golpe más al asturianu, dempués del intentu de valtar el Plan de Normalización de Carreño”.

Al señor De Lorenzo “esixímos-y como na ocasión anterior que retire esta orde, yá que los planes de normalización y les ordenances lleven décades funcionando ensin nengún tipu de problema xurídicu en munchos conceyos asturianos y la so reclamación nun tien base xurídica, pues la Llei d’Usu del asturianu permite a los Conceyos esti tipu de midíes, tal y como yá afitó nun informe xurídicu’l Gobiernu d’Asturies, al traviés de la Dirección de Planificación Llingüística”.

Al equipu de gobiernu de Noreña y a tolos grupos políticos “solicitámos-yos que se nieguen a acatar esta sentencia y que sigan la llucha nos tribunales hasta acabar toles posibilidaes. El Gobiernu d’Asturies ha da-y sofitu inmediatu a Noreña nesta situación y mediar col Gobiernu d’España pa que retiren esti ataque inxustificáu.

  Categories:
Loading Facebook Comments ...