Iniciativa pol Asturianu celebra’l resultáu electoral

Iniciativa pol Asturianu celebra’l resultáu electoral
27 mayu 11:00 2019 Imprimir

N’acabantes conocese los resultaos electorales d’esti domingu que dan al bloque favoratible a la oficialidá la mayoría con 26 diputaos (20 PSOE, 4 Podemos, 2 IX) Iniciativa pol Asturianu celebraba’l resultáu electoral porque “podría permitir una reforma estatutaria cola oficialidá y vamos trabayar por ello”.

El presidente d’Iniciativa pol Asturianu, Inaciu Galán, celebró los resultaos d’esta nueche pasada “como un momentu hestóricu pol que se lleva trabayando más de cuatro décades de llabor pol asturianu”. Inaciu Galán esplicó na mesma nueche electoral que’l resultáu de les elecciones autonómiques d’Asturies “permite falar d’un momentu hestóricu y confirma’l consensu social en favor de la oficialidá, yá que les fuercies que lleven la oficialidá nos sos programes electorales sumen 28 diputaos, si cuntamos a Foro, que falaba nel so programa d’esperar a un momentu de consensu, que consideramos que los resultaos d’esta nueche demuestren que yá ta equí, polo qu’hai que siguir trabayando en buscar un alcuerdu”.

“Los datos demuestren tamién que defender la oficialidá non solo nun supón una perda de votos pa los partíos que se sumen a ella, sinón que ye una midida mui bien recibida pola sociedá, como pue vese colos resultaos de la FSA-PSOE, que llevaba la oficialidá per primer vegada nel so programa y meyoró abondo los sos resultaos”, afirmó Inaciu Galán.

Pa la organización tamos énte un momentu de cambiu que podría permitir que se saque alantre una reforma estatutaria nesta próxima llexislatura. Galán esplicó que “vamos siguir trabayando pa sumar a otres formaciones al consensu pola oficialidá, porque esta ha ser una cuestión que mos axunte a tolos asturianos y asturianes alredor de los drechos llingüísticos y la conservación del patrimoniu cultural y llingüísticu d’Asturies, na izquierda y na drecha”.

“Pela nuesa parte, como organización civil, vamos tar faciendo’l llabor que mos correspuende, siguir afalando’l consensu y esixendo a los partíos que lleven la oficialidá nel programa que pongan en marcha les midíes necesaries pa facer la reforma efectiva de la forma más áxil que seya posible, asina como pa que, entrín y non, lleven alantre les midíes de normalización al altor de les circunstancies”.

  Categories:
Loading Facebook Comments ...