Portada Uncategorized Iniciativa pol Asturianu aconceya col PP p’aldericar sobre l’idioma

Iniciativa pol Asturianu aconceya col PP p’aldericar sobre l’idioma

by redacción asturnews

Los representantes del Partíu Popular y d’Iniciativa pol Asturianu aconceyáronse la selmana pasada p’aldericar sobre l’idioma y abrir una nueva etapa de collaboración, alcordando entamar una nueva etapa de rellación y de collaboración pa falar de manera sosegada, tranquila y moderada sobre l’idioma.

Iván Llera, presidente d’Iniciativa pol Asturianu, ya Inaciu Galán, vocal de Rellaciones Institucionales, aconceyaron esti miércoles pasáu con Álvaro Queipo, secretariu xeneral del PP d’Asturies, y con Matías Rodriguez Feito, vicesecretariu de Bienestar Social y Cultura del partíu, pa falar de diferentes cuestiones relatives a una posible reforma estatutaria y sobre la situación actual del idioma.

Nesi sen, los representantes de la organización animaron al PP a tener una postura coherente cola llingua asturiana pa cuntar d’esta manera cola mesma postura que col restu de llingües d’España. Pa la entidá, la realidá llingüística d’Asturies ye asemeyada a la d’otros territorios con llingua propia, como Galicia, onde dos llingües conviven n’armonía y respetu, pero cola diferencia de la desigualdá del reconocimientu de los drechos d’una parte de la sociedá nun s’alcuentren reconocíos.

Iván Llera, presidente d’Iniciativa pol Asturianu, amestó que “l’asturianu ye un patrimoniu cultural de tola ciudadanía y que nun ye nin d’izquierdes nin de dreches. Ye un deber de toos y toes cuidalu, mantenelu y tresmitilu a les xeneraciones nueves pa consiguir caltener la tresmisión xeneracional y siguir salvando l’idioma. En Galicia naide pensaría que la llingua propia ye d’una tendencia política d’un partíu, pues n’Asturies lo mesmo”.

Amás, dende la organización apuntóse que “la oficialidá ye la ferramienta constitucional pa llograr la igualdá de drechos de la ciudadanía asturfalante y que les persones tienen los mesmos drechos falen la llingua que falen. Nun hai nada más constitucional que defender la oficialidá de la llingua asturiana”. Pa terminar, los representantes del Partíu Popular y d’Iniciativa pol Asturianu alcordaron entamar una nueva etapa de rellación y de collaboración pa falar de manera sosegada, tranquila y moderada sobre l’idioma.

Tamién te podria gustar