Iniciativa pide un director pa RTPA “qu’apueste pol asturianu”

by redacción asturnews | febrero 5, 2019 1:05 pm

Iniciativa pide a los partíos que pongan al frente de RTPA un director qu’apueste pol asturianu
L’asociación de defensa de los derechos llingüísticos empobínase especialmente a l’actual mayoría pro oficialidá esistente nel conseyu d’alministración del ente.

Iniciativa pol Asturianu esixe a los partíos con representación nel Conseyu d’Alministración de RTPA que nomen un director o directora qu’apueste por polítiques de programación que contribuyan a normalizar l’asturianu y el gallego-asturianu.

L’asociación de defensa de los derechos llingüísticos empobínase especialmente a l’actual mayoría pro oficialidá esistente nel órganu rector de la radiotelevisión pública. Iniciativa entiende que si estes fuercies tán a favor de dotar al asturianu del máximu rangu llegal ye porque creen que ye necesario normalizala socialmente.

Iniciativa pol Asturianu recuerda que los medios de comunicación tienen un papel central a la hora de revertir l’actual procesu de minorización del asturianu y el gallego-asturianu, oxetivu qu’agora comparten la mayor parte les fuercies polítiques representaes nel conseyu d’alministración.

Demientres el mandatu d’Antonio Virgili la RTPA retrocedió notablemente nesi oxetivu, pasando del tope másimu del 5 por cientu d’emisiones n’asturianu que llegó a algamar hai cuasi una década a l’actual 1 por cientu. Depués de cásique tres llustros d’emisiones, llegó la hora de dar un xiru a l’actual situación y apostar d’una vez por toes por una RTPA que contribuya a normalizar l’asturianu y el gallego-asturianu.

Source URL: http://asturnews.com/iniciativa-pide-un-director-pa-rtpa-quapueste-pol-asturianu/