Portada Patrimoniu Iniciativa pide sofitu institucional pal Archivu de la Tradición Oral d’Asturies

Iniciativa pide sofitu institucional pal Archivu de la Tradición Oral d’Asturies

by redacción asturnews

Iniciativa pol asturianu pidia esti miércoles sofitu institucional pal Archivu de la Tradición Oral d’Asturies, convencíos de que la pervivencia del Archivu d podría sacase alantre cola creación d’una cátedra universitaria.

L’Archivu de la Tradición Oral d’Asturies, con un fonderu trabayu dende 1986, ta en riesgu de desapaición pa Iniciativa pol Asturianu qu’esti día sacaba una nota de prensa de sofitu: “Esti archivu atesora unu de los repositorios de cultura oral y popular y de patrimoniu inmaterial más importantes de la península. Y ta consideráu como uno de los más nutríos y relevantes de los que fueron axuntaos n’Europa y nel mundu”.

L’archivu, qu’ntegra más de mil hores de grabaciones n’audiu y en videu y una bayurosa colección de semeyes de gran valir documental, científicu y artísticu recopilaes a lo llargu de los trenta años postreros, valoralu abondo l’asociación polos rexistros y les semeyes que tien, que “cubrieron 863 noyos de población pertenecientes a 67 conceyos asturianos, amás d’otros 84 noyos de población que s’estienden per Cantabria, Llión, Zamora, Salamanca, Cáceres, Lugo, Ourense y norte de Portugal”.

Nesi mesmu archivu caltiénense unos 30.000 rexistros de lliteratura oral, amás d’una peramplia gama de testimonios d’hestoria oral venceyaos a la emigración asturiana a América y Europa, la Guerra Civil Española cola so posguerra, los neños de la guerra” na Unión Soviética, la Segunda Guerra Mundial, los oficios tradicionales y la vida cotidiana na Asturies del sieglu XX.

La entidá sofita que “se garanticen la institucionalización académica y la continuidá y el desenvolvimientu de los trabayos del Archivu de la Tradición Oral d’Asturies, so la dirección del so ceador Jesús Suárez López, nel marcu de la Universidá d’Uviéu pa poder protexer, asina, una xera fundamental pa la cultura y la hestoria asturiana”.

Tamién te podria gustar