Portada Uncategorized Iniciativa pide esfuerciu pa cumplir pa col artículu 3.2 de la Constitución

Iniciativa pide esfuerciu pa cumplir pa col artículu 3.2 de la Constitución

by redacción asturnews

Iniciativa pol Asturianu reclama un esfuerciu políticu pa llograr el cumplimientu del artículu 3.2 de la Constitución n’Asturies y fai un llamáu “a un trabayu colectivu y con consensu pa llograr la igualdá de drechos de la ciudadanía falen la llingua que falen”. La entidá recuerda nun comunicáu que l’únicu mecanismu llegal pa garantizar la llibertá ye la oficialidá de la llingua asturiana.

Nesti 6 d’avientu, día de la celebración de la conmemoración del aniversariu de la Constitución Española, Iniciativa pol Asturianu aprovechó pa reclamar un esfuerciu políticu pa llograr el cumplimientu del artículu 3.2 de la Constitución n’Asturies. La entidá considera que ye un momentu importante pa dar pasos de manera consensuada, con diálogu y con altura de mires pa llograr conxuntamente siguir trabayando pol idioma dende les instituciones.

“Dende Iniciativa pol Asturianu queremos facer un llamáu a un trabayu colectivu y con consensu pa llograr la igualdá de drechos de la ciudadanía falen la llingua que falen. La oficialidá ye una medida constitucional que va aportar igualdá, progresu y llibertá a tolos y toles asturianes” apuntaron dende la entidá.

Nesi sentíu, la organización recordó les pallabres de Borja Sánchez, conseyeru de Ciencia, Innovación y Universidá del Gobiernu d’Asturies, en sede parlamentaria apuntando que “nun esisten mecanismos llegales pa garantizar l’usu llibre del asturianu na Universidá”. Por ello, Iniciativa pol Asturianu recuerda que l’únicu mecanismu llegal pa garantizar la llibertá ye la oficialidá de la llingua asturiana.

Ye tamién un bon día pa insistir en que namás consiguiendo un consensu suficiente, 27 de 45 votos nel parllamentu asturianu y mayoría nel Congresu de los Diputaos, ye posible consiguir la oficialidá. Esta llexislatura ye’l momentu de que los partíos lideren esta reforma con alcuerdos tresversales y pongan en marcha los preseos llexislativos colos plazos que garanticen mesmo l’alcuerdu que los plazos suficientes, teniendo en cuenta tolos pasos precisos pa ello.

Pa terminar, dende Iniciativa pol Asturianu apuntaron que “nestos momentos que soplen vientos a favor de la llingua asturiana, ye’l momentu de construyir molinos y non muries. Dempués de tantes bones noticies pal idioma nesti añu (la financiación estatal pa l’ALLA, l’acreitación oficial d’asturianu, la creación del Conseyu Asesor…) ye’l momentu de trabayar de manera consensuada, sumando, ensin esclusiones pa llograr da-y normalidá constitucional al idioma”.

Tamién te podria gustar