Portada Comunicación Iniciativa noma d’ataque a la autonomía los conceyos la decisión de Gabino de Lorenzo

Iniciativa noma d’ataque a la autonomía los conceyos la decisión de Gabino de Lorenzo

by redacción asturnews

La decisión de la Delegación del Gobiernu d’España n’Asturies d’anular el Plan de Normalización Llingüística de Carreño al traviés d’una orde al Conceyu na que-y reclama qu’eche atrás esti testu y los sos efectos nel plazu d’un mes, ye considera por Iniciativa pol Asturianu un ataque políticu contra l’asturianu llamentable.

Nuna nota de prensa asoleyada esti martes pela mañana, Iniciativa pol asturianu diz que “informaos d’esta situación per parte de l’alcaldesa de Carreño, Amelia Fernández López, nun podemos más que condergar esti ataque a l’autonomía de los conceyos pa establecer midíes de normalización del asturianu, tal y como afita la Llei d’Usu del asturianu de 1998. La llei diz nidiamente nel puntu 1 del Artículu 8 que “los ayuntamientos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies” lo que dexa a les clares pala organización de defensa del idioma que la decisión de la Delegación del Gobiernu torga “la posibilidá de poner en marcha midíes, esactamente lo que se fai al traviés d’un plan de normalización como’l qu’agora quieren prohibir dende la Delegación dirixida por Gabino de Lorenzo”.

Esti nuevu ataque políticu contra l’asturianu del Partíu Popular ye especialmente llamentable, pa Iniciativa porque “usa ferramientes del Estáu y oculta cola apariencia d’una decisión xurídica lo que nun ye más qu’un nuevu intentu de da-y un golpe más al asturianu”.

Al señor De Lorendo esíxen-y que retire esta orde, “yá que los plane de normalización lleven décades funcionando ensin nengún tipu de problema xurídicu en munchos conceyos asturianos y la so reclamación nun tien base xurídica, pues la Llei d’Usu del asturianu permite a los Conceyos esti tipu de midíes”.

Y al equipu de gobiernu de Carreño solicíten-y que “se niegue a acatar esta sentencia y que sigan la llucha nos tribunales hasta acabar toles posibilidaes. El Gobiernu d’Asturies habría da-y sofitu inmediatu a Carreño nesta situación y mediar col Gobiernu d’España pa que retiren esti ataque inxustificáu”.

Tamién te podria gustar