Portada Política Iniciativa insiste na importancia de facer normal l’usu de la llingua n’aición del Gobiernu

Iniciativa insiste na importancia de facer normal l’usu de la llingua n’aición del Gobiernu

by redacción asturnews
Foto de la xunta

Iván Llera, presidente d’Iniciativa pol Asturianu, ya Inaciu Galán, vocal de rellaciones institucionales, aconceyaron esti díua con Berta Piñán, Conseyera de Cultura, Política Llingüística y Turismu del Principáu d’Asturies y el so equipu ya insistieron na importancia de “facer normal l’usu del asturianu en tola acción del Gobiernu d’Asturies”.

Esti ye’l primer conceyu ente representantes de la organización y la Conseyera dempués de la toma de posesión de Berta Piñán. El presidente d’Iniciativa pol Asturianu comentó que “insistimos a la Conseyera de Cultura la importancia de facer normal l’usu del asturianu en tola acción del Gobiernu d’Asturies. La llingua asturiana tien que ser un elementu tresversal de trabayu nes diferentes Conseyeríes del Gobiernu d’Asturies y toles estayes del mesmu. Treslladamos que l’asturianu nun puede quedar arrequexáu pa coses propies de la Selmana de les Lletres o pa lo que dependa de la Conseyería de Cultura, o depender de la bona voluntá de los responsables”.

Llera apuntó tamién que “pidimos un cambiu na Conseyería porque, como denunciamos va unes selmanes, hubo una ufierta pública sobre señalización d’espacios turísticos que nun facía nenguna referencia al asturianu o al usu de la toponimia tradicional de los llugares”.

Los representantes de la entidá apuntaron tamién que “dende la nuesa organización amosamos tamién el descontentu colos pasos atrás na toponimia y pidimos un esfuerzu pa sacar alantre la toponimia nos conceyos que tovía nun la tienen aprobada”.

Pa terminar, Iván Llera aclaró que “celebramos la bona voluntá de la Conseyera y ofrecemos la nuesa collaboración y sofitu pa siguir trabayando nun espaciu d’alcuentru y de diálogu pa siguir dando normalidá y mayor presencia del asturianu na Alministración y nel Gobiernu”.

Tamién te podria gustar