Iniciativa inaugura los sos cursos

Iniciativa inaugura los sos cursos
20 ochobre 15:05 2015 Imprimir

Iniciativa pol Asturianu y l’Academia de la Llingua Asturiana (ALLA) celebraron esti llunes la inauguración de los cursos que l’asociación enrama esti ochobre.

La inauguración de los cursos tuvo lugar a les 19 horas  nel Conseyu de la Mocedá de Xixón y participaron nella, xunto a los alumnos, Fonsu Martín, profesor de los cursos en Xixón, ya Inaciu Galán, presidente d’Iniciativa pol Asturianu y coordinador de los cursos. Esta ye la inauguración central de los cursos, pero a lo llargo de la selmana van celebrase otros actos n’Uviéu y Sotrondio, colos alumnos de los respectivos conceyos.

Iniciativa pol Asturianu valora mui positivamente “esta esperiencia que tuvo una perbona acoyida, con más 120 matriculaos nesta primer esperiencia convocando cursos nun ambiciosu plan formativu a lo llargo de toa Asturies. Yera la primer vegada qu’Iniciativa pol Asturianu convocaba cursos d’asturianu en más de 14 conceyos al mesmu tiempu y el resultáu foi mui positivu, triplicando la matriculación a les anteriores convocatories, cuando namás se ficieron cursos en Xixón”.

Nesta edición hai alumnos matriculaos también nel cursu a distancia al traviés d’una plataforma de cursos en llinia basada en Moodle, dende Italia, Estaos Xuníos, Méxicu, Inglaterra, y comunidaes como’l País Vascu, Cataluña, Madrid, Balears o La Rioja. La mayoría son asturianos emigraos o fíos d’emigrantes asturianos, pero tamién hai alumnos qu’ensin tener rellación con Asturies quixeron interesase por esta llingua europea cada vegada más conocida internacionalmente.

  Categories:
Loading Facebook Comments ...