Iniciativa denuncia l’ausencia del asturianu na nueva cartelería de Llangréu

Iniciativa denuncia l’ausencia del asturianu na nueva cartelería de Llangréu
15 febreru 09:50 2021 Imprimir

Iniciativa pol Asturianu denuncia l’ausencia del asturianu na nueva cartelería turística de Llangréu y llamenta que la llingua vernácula nun tenga presencia nestos paneles al mesmu nivel que l’inglés y el castellán. La entidá reclama la presencia normal de la llingua asturiana nes redes sociales corporatives del Conceyu y na páxina web.

El Conceyu de Llangréu instaló va unes selmanes la nueva cartelería informativa de calter turísiticu en dellos puntos del conceyu. Estos paneles ufierten diferentes datos hestóricos de dalgunos puntos emblemáticos faciéndolo n’inglés y en castellán pero escaeciendo l’asturianu. Nesi sen, Iniciativa pol Asturianu denuncia l’ausencia del asturianu nesta nueva cartelería y llamenta que “pretendiendo facer una política turística nun se tenga en cuenta nin se ponga en valor la llingua propia que ye una seña d’identidá del conceyu y d’Asturies”.

Iniciativa llamenta que la llingua asturiana nun tenga presencia nestos paneles al mesmu nivel que l’inglés y el castellán. “Resulta incomprensible que nun conceyu como Llangréu, onde la presencia de la llingua asturiana na sociedá tien una presencia importante, el vecindariu nun pueda averase a conocer la hestoria del conceyu nel so propiu idioma”, apunten dende la organización.

Asinamesmo, la entidá reclama tamién la presencia normal del asturianu nes redes sociales del Conceyu y na propia páxina web qu’anque ta preparada pal usu del asturianu apaecen les entraes únicamente en castellán.

  Categories:
Loading Facebook Comments ...