Iniciativa denuncia discriminación llingüística na Conseyería d’Educación

by redacción asturnews | septiembre 20, 2018 11:08 am

Iniciativa pol Asturianu vieno acabante denunciar esti xueves la discriminación d’una ciudadana por utilizar l’asturianu nuna comunicación cola Conseyería d’Educación nun nuevu casu d’inclumplimientu de la llegalidá vixente alrodiu de la llingua asturiana.

El pasáu llunes 10 de setiembre na organización Iniciativa pol Asturianu recibíose la quexa d’una ciudadana que foi discriminada al usar l’asturianu nuna conversación telefónica cola Alministración Pública, particularmente cola Conseyería d’Educación y a raíz de la situación dende la organización treslladóse una quexa formal al Gobiernu del Principáu d’Asturies, al amparu de la Llei, y amás reclamóse una disculpa a la ciudadana que sufrió la discriminación

De manera concreta, al contestar la llamada y al comprobar al entamu de la conversación que la ciudadana facía usu de la llingua asturiana la rempuesta recibida foi “Por favor, hábleme en castellano” a lo que la ciudadana responde qu’ella tien drechu a dirixise a l’alministración n’asturianu tando amparada pola llei. La funcionaria vuelve a retrucar que “también yo tengo derecho a pedirte que me hables en castellano”.

Nesti sentíu hai que recordar que la Llei 1/1998, de 23 de marzu, d’usu y promoción del bable/asturianu ampara a la ciudadana ya que recueye nel so artículo 4 referíu al usu alministrativu que: 1. Tolos ciudadanos tienen drechu a emplegar el bable/asturianu y a expresase n’él, de pallabra y por escritu. 2. Tendráse por válido a tolos efeutos l’usu del bable/asturianu nes comunicaciones orales o escrites de los ciudadanos col Principáu d’Asturies.

A raíz d’esta llamentable situación dende la organización treslladóse una quexa formal al Gobiernu del Principáu d’Asturies, al amparu de la Llei, y amás reclamóse una disculpa a la ciudadana que sufrió la discriminación. Iniciativa pol Asturianu tamién pidió un compromisu por parte de los responsables de la conseyería y del Gobiernu pa qu’estes situaciones nun se vuelvan a dar y demandó la puesta’n marcha de más mecanismos de formación dientro de l’Alministración Pública Asturiana pa que’l funcionariáu conozca la llexislación vixente y pueda tener un mínimu conocimientu voluntariu d’asturianu.

P’acabar pa Iniciativa pol Asturianu demuestrase, una vegada más, que la oficialidá ye necesaria porque hai ciudadanos que tovía tienen los sos drechos mermaos.

Source URL: http://asturnews.com/iniciativa-denuncia-discriminacion-llinguistica-na-conseyeria-deducacion/