Iniciativa defende la oficialidá como ferramienta d’igualdá

Iniciativa defende la oficialidá como ferramienta d’igualdá
30 11:51 2018 Imprimir

Iniciativa pol Asturianu defende la oficialidá como una ferramienta pa consiguir igualar los drechos llingüísticos, preservar el patrimoniu y convertise nun elementu dinamizador de la economía, depués de volver denunciar otra llamentable situación de discriminación llingüística esta vegada na Conseyería de Servicios Sociales.

La declaración facíala Inaciu Galán, presidente d’Iniciativa pol Asturianu, impartió na tarde del xueves una charra nel espaciu El Manglar n’Uviéu. L’actu foi presentáu por Víctor Suárez, cofundador d’Iniciativa pol Asturianu y activista pro drechos llingüísticos, y entamó cola proyección del documental ‘La vida ensin oficialidá’ nel que apaecen varios casos de discriminación llingüística.

“Güei proyectamos esti documental nel qu’apaecen una montonera de casos de discriminación llingüística, pero por desgracia esta situación nun para. Esta mesma selmana denunciamos un nuevu casu qu’afecta a la Conseyería de Servicios Sociales pola publicación d’un documentu nel que s’esixía nun usar otra llingua que nun fuera el castellán. Esto nun puede siguir asina. Y esta situación nun va cambiar mientres los drechos llingüísticos nun tean recoyíos. La oficialidá ye la solución a esti tipu de discriminaciones” apuntó Galán.
Galán dixo amás que “los defensores del idioma y la oficialidá, que somos la mayoría de la sociedá, queremos que los nuesos drechos tean reconocíos nun estatus d’igualdá colos falantes de castellán. Los asturfalantes nun vamos contra nadie, cada día tenemos más sofitos, xenerando más consensu social que cada día va medrando al rodiu del nuesu patrimoniu llingüísticu”.

El presidente d’Iniciativa pol Asturianu acabó diciendo que “tamos güei n’Uviéu pa recordar que la oficialidá ye la ferramienta llegal pa igualar los drechos llingüísticos de los y les asturianes. Amás va ser una manera que mos va sirvir pa mantener vivu el patrimoniu llingüísticu d’Asturies. Y tamién porque va xenerar riqueza dinamizando la industria y la economía”.

  Categories:
Loading Facebook Comments ...