Iniciativa convoca un Seminariu universitariu alrodiu de la Oficialida

by redacción asturnews | febrero 15, 2018 11:49 am

El mes de marzu va entamar con un Seminariu Universitariu que se va desenvolver nel edificiu históricu de la Universidá d’Uviñéu y qu’acoyerá a espertos de toles árees amosando les rzones, consecuencies y ventayes de la Oficialidá dende distintes perspectives, tantu profesionales como académiques.

Organizáu pola ONG Iniciativa pol Asturianu, el seminariu va tener, ente toles ponencies ya intervenciones, a un bon garapiellu d’espertos de prestixu internacional, reconocíos, y bien conocederes de la realidá asturiana y española. Ente ellos van tar l’escritor Xuan Bello, la investigadora Isabel Hevia o’l xurista y lletráu del Tribunal Constitucional José Manuel Pérez Fernández.

Inaciu Galán, presidente d’Iniciativa pol Asturiana desplicaba esti miércoles nuna nota de prensa de la ONG que van cuntar “con una riestra de profesionales de luxu, queremos ufrir a la sociedá tola información sobre lo muncho positivo que tien la oficialidá en tolos ámbitos: sistema educativu, creación de riqueza y empléu, drechos y llibertaes, etc.”.

El programa completu va dase a conocer la selmana que vien nuna rueda de prensa, pero dende la organización yá anuncien que va ser un seminariu que “va sirvir pa valtar munchos prexuicios y poner en circulación muncha información positiva que nun se te dando a los asturianos”. Galán recuerda que “pidir la oficialidá nun ye más que pidir que se cumpla la Constitución n’Asturies, hai un consensu social y políticu y ye’l momentu d’avanzar nesa dirección, buscando un mod llabor”.

Cabe destacar que los actos va inauguralos el rector de la Universidá d’Uviéu, Santiago García Granda, que yá amosó nos meses pasaos l’apoyu de la Universidá a la oficialidá. Les xornaes que van ser el 2 y 3 de marzu van ser abiertes al públicu anque se recomienda inscribise. Quien quiera cuntar con un diploma de reconocmientu habrá facer un pagu de diez
euros nel momentu de facer la inscripción, na páxina web d’Iniciativa pol Asturianu. Amás, como pieslle del seminariu, el sábadu 3 dende les 14:30 hores va haber una espicha na sidrería La Pumarada d’Uviéu (C/ Gascona, 8), a la que puede pueden apuntase los asistentes por 25 euros.

Source URL: http://asturnews.com/iniciativa-convoca-un-seminariu-universitariu-alrodiu-de-la-oficialida/