Iniciativa abre la votación pa escoyer la ‘Meyor noticia pal asturianu en 2018’

Iniciativa abre la votación pa escoyer la ‘Meyor noticia pal asturianu en 2018’
04 xineru 13:46 2019 Imprimir

Iniciativa pol Asturianu pon en marcha nesti entamar del nuevu añu la so votación popular pa escoyer la ‘Meyor noticia pal asturianu en 2018’, una iniciativa que cumple yá 5 años y que cada añu que pasa va medrando tanto nel númberu de noticies positives como de participación.

Inaciu Galán, presidente d’Iniciativa pol Asturianu, vieno acabante presentar la campaña ‘Meyor noticia pal asturianu en 2018’ cola que se pretende escoyer, pente medies d’una votación popular, la meyor noticia pa la llingua asturiana nel añu 2018. Galán dixo que “esta iniciativa cumple yá 5 años y cada añu que pasa va medrando’l númberu de noticies positives alrodiu del asturianu y ye la prueba de cómo l’asturianu va ganando espacios y apoyos na sociedá”.

El presidente d’Iniciativa pol Asturianu apuntó que “con esta campaña pretendemos facer llegar a los asturianos y les asturianes delles bones noticies pal nuesu idioma y treslladar que l’asturianu va ganando presencia, normalidá y apoyu na sociedá. Realidaes como que 60 de los 78 conceyos tienen aprobada la toponimia tradicional, qu’un ex presidente d’España apoye per primer vegada la oficialidá del asturianu o que’l Rector de la Universidá d’Uviéu eche una conferencia n’asturianu son una amuesa clara de qu’esta llingua tien futuru”.

Inaciu Galán terminó diciendo que “los y les participantes pueden escoyer ente un total de más de 35 bones noticies pal asturianu de diferente tipu, pudiendo seleccionar hasta 10 al mesmu tiempu”. La votación va tar abierta na páxina web: https://goo.gl/SQkGxh hasta’l domingu 13 de xineru. El llunes 14 daráse a conocer la llista de meyores noticies de 2018.

  Categories:
Loading Facebook Comments ...